Pilar Garrido: "Etxebizitza eskubidea babesten duten neurriak hartu behar dira"
Etxebizitza politiken gaineko adierazpenak egin zituen atzo Podemos Euskadik. Errenteriako Udalak udalerria tenkatutako eremu izendatzeko eskaera ere izan zuten hizpide, eta eredu gisa jarri.
Podemos Euskadiko ordezkariak atzo, Iztieta-Ondartxon. Argazkia: Podemos Euskadi Podemos Euskadik adierazpenak egin zituen atzo Errenteria-Oreretan, etxebizitza politiken gainean. Pilar Garrido Podemos Euskadiko koordinatzaile orokorrak eta Maite Gartzia Errenteriako Udaleko kultura zinegotziak egin zituzten adierazpenak, Iztieta-Ondartxon. Biek ala biek, egin zuten etxebizitza eskubidea babesten duten neurrien alde, eta horren harira Errenteriako Udalak udalerria tentsio handiko eremu izendatua izan dadin Eusko Jaurlaritzari egindako eskaera izan zuten hizpide biak, eta nabarmendu, “Errenterian hartzen diren erabaki eta neurriak” direla egokiak.
Errenteriako Udala izan da eskaera egin duen lehen udalerria.
Eremu tenkatu izendatzeak, udalerrian alokairuzko etxebizitzen prezioari muga jartzea ahalbidetuko duela, eta gainera etxebizitza publiko parkea handitzea ere ekarriko duela nabarmen jarri zuen Gartziak.
Pedro Sanchez, Espainiako Gobernuko presidenteak etxebizitza erosteko gazteei eta adin txikiko seme-alabak dituzten familiei begira iragarri duen neurriaz ere mintzo zen Garrido: “2.500 miloi euro aurreikusi ditu etxebizitza erosketa errazteko. Santander banketxetik ateratako neurria da hori”. Horrekin batera, eraginik gabeko neurria dela salatu zuen ere, “etxebizitzarako sarbidea bermatuta dutenei lagunduko die, ez zailtasun handiagoak dituztenei. Etxebizitzaren prezioa garestituko du, baita alokairuarena ere, eta gainera, familiak gehiago zorpetuko ditu oraindik”.
Neurri horien aurrean, “etxebizitzaren eskubidea babesten duten neurriak” galdegin zituen Garridok, eta Errenterian “hartzen direnak” jarri zituen eredu.
