Udalak 175.000 euro bideratuko ditu zaurgarritasuna arintzeko
Oiartzuar zaurgarrienak babesteko 175.000 euroko ekarpena egingo du udalak 2024an. Zerga eta tasen ordainketan hobariak izango dituzte
Egoera ekonomia larrian dauden Oiartzungo norbanako eta familiak laguntzeko 175.000 euro bideratuko ditu Oiartzungo Udalak 2024. urtean. “Premiazko egoerei” erantzuteko diru-partida gorde du, oiartzuar zaurgarrienak babesteko.
“Laguntza hauekin”, adierazi du Oiartzungo Udalak, “gizarte babesa indartu, guztiontzako oinarrizko bizi-baldintzak bermatu eta herritar denek premia nagusietarako baliabideak izatea ziurtatu nahi dugu”.
Hainbat gastu ordaindu ahal izateko egingo dituzte ekarpenak. Honakoak izango dira, besteak beste: elikadura, elektrizitatea, ura, berokuntza, arropa, garraioa, alokairua, hezkuntza edota mendeko pertsonen zaintzak eragiten dituen gastuak.
Udalak gaineratu duenez, “babesgabeen” gera daitezkeen egoerek izango dute lehentasun berezia: adingabeek, mendekotasun egoeran dauden herritarrek, genero indarkeriaren biktimek, etxerik gabekoek edota guraso bakarreko familiek. Laguntza horiek puntualak izan daitezke, edo epe bati lotutakoak.
Gainera, zailtasunak eta babesgabetasun arrisku egoeran dauden adingabekoak eta haien familientzako 30.000 euro gorde ditu.
2024 osoan izango da zabalik laguntza eskatzeko epea.
Zerga eta tasetan, hobariak
Zuzeneko diru-laguntzez gain, hainbat udal tasatan hobariak ere ezarriko dituzte egoera ekonomiko zailean dauden oiartzuarrentzat.
Hobarien onuradunek ez dute 2024ko hondakinen eta ur eta estolderiaren tasa ordaindu beharko. Hilaren 28a izango da salbuespen hauek eskatzeko azken eguna.
