Muturreko itsasaldiak eragindako egoeragatik kezka adierazi du udalak
Donibane eta San Pedroko alkateordeek "kezkaz eta arduraz" bizi dute egoera. Jakinarazi dute larrialdien protokoloa eguneratuko dutela, aurrerantzean mekanismoak urgentziaz aktibatzeko.
Larunbat gaueko irudia da, Donibanekoa. Asteburuko marea bizien ondorioz, itsasoak Donibane eta San Pedroko kaleak hartu zituen larunbat gauean, zenbait kalte eraginez. Muturreko eguraldien ondorioz, bi barrutiek ur gainezkatze agerikoak jasan dituzte beste behin. Alkateordeek “kezkaz eta arduraz” bizi dute itsasaldiek asteburuan sortutako egoera: “Ez da lehenengo aldia. Baina, aldi berean, badakigu ez dela azkena izango, eta beraz, ezinbestekoa da udaletik gure eskura dauden mekanismoak aktibatzea, urak gure herrietan izan lezakeen inpaktua arintze aldera”, esan du Donibaneko alkateorde Aintzane Tabernak.
San Pedroko alkateorde Miguel Mari Torreak ere kezka agertu du, eta adierazi du sentsazioa duela “egoera gero eta muturrekoagoa dela”: “Beti sartu izan da ura plazetara, kaleetara eta zenbait lokal nahiz etxebizitzetara, baina esango nuke azken urteotan geroz eta ur gehiago sartzen ari dela, eta egoerari aurrea hartu behar diogu”, esan du. Bizilagunek ere hala dela berretsi dutela erantsi du, asteburuan alkateordeei esandakoaren arabera: “Itsas maila ere gora doa, eta horrek, jakina, eragin nabarmenak ditu kostaldean bizi garenon egunerokoan”, erantsi du alkateordeak.
Hainbat prebentzio neurri indarrean jartzeko aukerak aztertzen ari ari dira jada, Teo Alberro alkatearen gidaritzapean. Hala, udaleko larrialdietarako ekintza plana eguneratu eta indarrean jarriko dutela hitz eman dute alkateordeek, “aurrerantzean antzerako egoerak gertatzen direnean, protokoloa aktibatu eta lagungarri izan daitezkeen udal zerbitzuak urgentziaz aktibatzeko”.
Planaz aritzeko premiazko bilera egingo du aurki udal gobernuak inplikatutako sailekin, eta larrialdietarako protokolo hori diseinatzeaz gainera, Donibanen eta San Pedron ezar liratekeen prebentzio edo arintze sistemak ere aztertuko dituzte. Datu guztiak bildu ondoren, informazio batzorde ireki batera deituko dituzte bi barrutietako bizilagunak.
