Odola emateko saioek toki berria izango dute
Elorsoro kiroldegiko bilera-gelan izango da urteko lehenengo odol-ematea. Hilaren 20rako egin dute deialdia.
Oiartzungo odol-emaileek bi hilean behin egiten dute likido gorria borondatez emateko deia. Hilabete bikoitietan izaten da, eta aurtengo lehenengo saioa hilaren 20an (datorren asteartean) izango da.
Orain Manuel Lekuona bibliotekan egin izan dute, eta aurretik, anbulatorioan. Urtea hastearekin batera toki berria izango dutela iragarri dute: Elorsoro kiroldegiko bilera gelan izango da aurrerantzean.
Pandemia iritsi zenetik gertatzen den bezala, aldez aurretik hartu beharko da hitzordua. 943 007 885 edo 943 317 091 telefono zenbakietara deitu beharko da, saioa izango den eguneko goizean bertan, 08:00etatik aurrera.
Odola emateko saioa 16:30ean hasiko da, eta 20:10ean bukatuko da.
Aurreko saioa abenduaren 12an izan zen, eta 42 emaile hurbildu ziren. Horietako bost izan ziren berriak. Horrela izan ziren datuak:
- O+: 16.
- O-: 10.
- A+: 9.
- A-: 1.
- B+: 1.
