June Sanchez Tolaretxipi Beka, Aizpea Etxeberriarentzat
2013an haurren minbizi baten ondorioz bi urterekin hil zen June Sanchez Tolaretxipi oroitzea, eta haur minbiziari aurre egiteko ikerketa bultzatzea du helburu bekak.
Beka jaso duen Biogurutzetako ikerlari taldea. Argazkia: Juneren Hegoak
Haurren minbizia ikertzea helburu duen June Sanchez Tolaretxipi Beka jaso du Aizpea Etxeberriak. Euskal Herriko Pediatria Elkarteak eta Juneren Hegoak elkarteak antolatzen dute beka, eta aurtengoa, laugarren ekitaldia du. Hirugarren urtez jarraian, Bizkaiko Biogurutzeta Institutuko Onkologia Pediatrikoko taldeak jaso du beka, Itziar Astigarraga ikertzaileak gidatuta.
«Guretzat oso garrantzitsua da ikerketa lagunduko duen ekarpen ekonomikoa. Juneren Hegoak elkarteak esleitu dizkigun azken hiru bekei esker, haurren minbizien diagnostikoan eta tratamenduan hobetu ahal izan dugu, hala nola, pediatriako sarkometan —pediatriako tumore guztien %15 gutxi gorabehera, azterketa genetikoak barne, eta gure pazienteek etekina atera diete arlo horretan egin ditugun aurrerapenei», azaldu du Aizpea Etxeberriak, bekaren laugarren ekitaldiko irabazleak.
Bekaren helburua da diruz laguntzea haurren onkologia ikerketa proiektu bat, diziplina horrekin zerikusia duen edozein arlotan, eta paziente talde horren diagnostikoan, jarraipenean, eta tratamenduan hobekuntzak egiten laguntzea, haien bizi itxaropena areagotzeko.
“Zoritxarrez gaur egun ikerketarako laguntzak mugatuak dira”, esan dute elkarteko kideek, eta Gobernuz Kanpo Erakundeen sektorea ere ez dela une ona bizitzen ari nabarmen jarri du, “horregatik 2022an finantzaketa partekatua jarri genuen martxan, eta jaso ditugun beste dohaintza batzuekin batera, Orereta Ikastolarena esaterako, bekaren ekitaldi honetarako ekarpena biltzen lagundu digu”, esan dute.
2015ean antolatu zuten lehen aldiz beka. 2013an haurren minbizi baten ondorioz bi urterekin zendu zen June Sanchez Tolaretxipi da Juneren Hegoak elkartearen inspirazio eta bere izena darama bekak ere. 2013an bertan sortu zuten haren gurasoek eta gertuko pertsona talde batek Juneren Hegoak elkartea Errenteria-Oreretan, eta harrezkero, laguntza sare bat sortu dute Araba, Bizkai eta Gipzukoan kalteberatasun egoeran diren, gaixotasun, aniztasun funtzionala edota adingabeen doluari aurre egin behar dieten familientzat. Bidea hasi zuenetik 72 adingabe artatu ditu (68 familia). Iaz 26 familia lagundu zituen, eta horietatik zortzi berriak izan ziren; bost terapian, farmazian eta bidaietan lagundu zituen elkarteak, eta hiru ospitalean.
Juneren Hegoak elkarteak emandako datuen arabera, Espainiako Estatuan urtero 1 eta 14 urte arteko haur eta nerabe minbiziaren 1.500 diagnostiko berri egiten dituzte: “Minbizia da adingabeen artean gaixotasunagatiko lehen heriotza arrazoia Minbizia duten Haurren Gurasoen Espainiako Federazioaren —FEPNC— arabera”.
Bihar izango da Haur Minbiziaren Nazioarteko Eguna.
Juneren Hegoak elkartea lagundu nahi dutenek hauetako bideren bat erabil dezakete: Boluntario egin nahi dutenei, posta elektroniko helbide honetara idazteko eskatu diete; hilero euro baten trukez Teamer izateko berriz, hemen sakatu. Dohaintza egiteko aukera ere badago (horretarako klik egin hemen). Juneren Hegoak elkartearen laguntzaile izateko aukera ere eskaintzen du elkarteak.
Horretaz gain, Sabadell banketxeko ES81 0081 4254 46 0001112822 kontu korrontean egin daiteke ekarpena, baita Bizum bidez ere 03930 kodea erabilita, edota dohaintzak sailean Juneren Hegoak bilatuta.
