Beraun kalean, bi plaza berri
Horiek eraikitzeko lanak, astelehenean hasiko ditu udalak; Beraun kaleko 5. eta 15. zenbakien artean egingo ditu plaza horiek.
Beraun kaleko plazen simulazio bat. Irudia: Herri Bizia Beraun kalean bi plaza berri egingo ditu Errenteriako Udalak. Datorren astelehenean, hasiko ditu udalak lanak Beraun kaleko 5. eta 15. zenbakien arteko atarien aurrealdean. Auzotarrentzat 1.700 metro koadro irabaztea ekarriko du jarduketa horrek udalak esan duenez, “egonlekuak, haurrentzako jolastokiak, eta landareria duen espazio berri bat irabaziko du auzoak esku hartze honen bidez”.
Ingurunea eraberritzeko esku hartzeak, gainera, hiri espazioa hobetzea aurreikusi duela erantsi du udalak, “daden hormak murriztu eta irisgarritasuna hobetuz”.
Lanak egiteko epea zortzi hilabetekoa izango da, eta 683.481,38 euroko inbertsioa egingo du udalak.
Ibilgailuen trafikoari dagokionean, udalerriko arteriarik garrantzitsuenetakoa da Beraun kalea udalak zehaztu duenez, “jendearentzat hiri atseginago bat egiten jarraitzeko, 2022an Beraun kalea berrantolatu eta eraberritzeko proposamen bat aurkeztu zuen udalak”. Proposamen horren helburua, oinezkoen segurtasun handiagoa bermatu, irisgarritasuna hobetu, eta mugikortasun iraunkorra sustatzea dela azaldu du; berdeguneetarako sarbidea ere erraztu nahi du, pertsonentzako egonlekuak irabaztearekin batera.
Proiektuak, hiru fase
Beraun kalerako egindako proiektua hiru fasetan banatu du udalak. Lehenengo fasean 63 ibilgailurentzat aparkaleku publikoa ondu zuen udalak kale horretan, “aparkalekurako espazioa optimizatu da, eta 13 plaza berri sortu. Aparkaleku publiko horri, Pontika parean, kale berean eraikitzen ari diren aparkaleku eraikina gehitu behar zaio”. Azken eraikin horretan aparkaleku plaza bat kontzesioan edo alokairuan eskatzeko epea zabalik dago.
Txakurren parkea ere birkokatu zen lehen fase horretan, eta saneamendu sistema hobetu.
Bigarren fasean, berriz, bi plaza berriak egingo ditu udalak.
Azkenik, hirugarren fasean, oinezkoen segurtasunarekin eta irisgarritasuna hobetzearekin zerikusia duten gaiak landuko dituela jakinarazi du udalak, “espaloiei jarraipena emango zaie eta bide sarea eta berdeguneetarako sarbideak ere hobetuz”.
Proiektu osoa gauzatzeko, 1.500.000 euroko inbertsioa egingo du udalak.
