Konpost eta Argazki Bat Behelainoan, Txerrimuñon
Hilaren 24an bilduko dira bi musika taldeak Txerrimuñon kontzertua eskaintzeko. 21:00etan hasiko da emanaldia.
Argazki Bat Behelainoan taldea. Argazki Bat Behelainoan donostiarrek eta Konpost gasteiztarrek kontzertua emango dute hilaren 24an (larunbata), 21:00etan hasita, Txerrimuñon. 10 eurokoa da sarrera.
Argazki Bat Behelainoan Egitasmoaren arima Adikune taldean aritutako Arkaitz Artola Arnaiz [Donostia, Egia] da. Orain Segurtasun eza [Bonberenea Ekintzak] diskoaren aurkezpen kontzertuetarako Jon Agiriano [Rukula], Iker Vazquez [Pelax], Iñigo Ozaeta [Pelax] eta Fermin Mendazona [Géra] musikariak batuko zaizkio Artolari. Iazko azaroan aurkeztu zuten diskoa, eta Txerrimuñokoa euren biraren azken kontzertua izango da. Post-rock doinuak, askotariko giro, gordeleku eta zirrikituetan barrena lantzen dituzte.
Konpost gasteiztarrak, berriz, 2018an dira sortuak. Lehen diskoa, pandemia tarteko, 2021ean argitaratu zuten, taldearen izen berekoa. Bigarrena 2023aren bukaeran aurkeztu zuten, GAP izenekoa. Haien musika lehenengoz entzun ahal izango da Oarsoaldean.
