Talaia Feminista Unea egingo dute larunbatean, Lekuona Fabrikan
Lekuona Fabrikan izango da, 09:00etatik 14:00etara, eta 2023. urteko Talaia Feminista dosierra landu eta itxiko dute bilkuran.
Talaia Feminista Unea egingo dute larunbatean Lekuona Fabrikan. Argazkia: Talaia Feminista Talaia Feminista Unea egingo dute larunbatean —hilak 17— emakume feminista, subiranista eta independentistek Errenteria-Oreretan. Lekuona Fabrikan izango da, 09:00etatik 14:00etara, eta 2023. urteko Talaia Feminista dosierra landu eta itxiko dute bilkuran. Iazko gertakari nagusien azterketatik abiatuta osatzen ari dira dosierra emakumeengan zein Euskal Herriko trantsizio feministan duten inpaktuari erreparatuta. Hori behin itxita, interpelazioari eta zabalkundeari ekingo diote.
“Dosierra osatzeko bidean emakume feminista subiranisten parte hartze zabala ezinbestekoa da guretzat, Talaia Feminista Unea edukiak lantzeko eta hausnartzeko momentua izango da; baita emakume feminista subiranistok biltzeko topagunea ere”, azaldu dute. Euskal Herriko dozenaka emakume feminista eta subiranisten topagune izango da, beraz, Lekuona Fabrika etzi.
Talaia Feministak hilabete amaierarako izango du osatuta 2023 behin betiko dosierra. Hala ere, azterketaren bidea ez dela hor bukatuko azaldu du, “dosierrak tresna praktiko eta erabilgarri izatea du xede, horregatik, irakurketa kolektiboa egin ondoren, bertan sortutako gogoetak eragile sozial, politiko eta sindikalengana eramango ditugu haien agendetan eragiteko”.
Talaia Feminista
2022ko abenduaren 17an abiatu zuen bere bidea Talaia Feministak, eta Euskal Herriaren koiuntura eta trantsizio feminista aztertzeko urteroko dosier bat egiteko konpromisoa hartu zuen:”Gure inguruaren irakurketa kolektibo bat egiteko ariketa bat da, aktualitatea irakurri nahi dugu begirada feministarekin eta subiranistarekin, modu kolektiboan. Euskal Herriaren luze zabalean bizi eta lan egiten dugun emakume feminista eta subiranisten artean egindako irakurketa, trantsizio feminista ebaluatu eta elikatzeko”.
Etzi Lekuona Fabrikan itxiko dutena lehen dosierra izango da.
