Agustina Otaola frontoiaren zorua birgaitzen hasi dira
Martxoaren bukaeran amaitzea aurreikusi du udalak. 49.000 euroko inbertsioa egin du zoladura lehengoratzeko.
Agustina Otaola pilotalekuan lanak martxan dira. Agustina Otaola udal kiroldegian hobekuntza lanak hasi ditu udalak. Zehazki, zoladura zaharberritzen ari da, instalazioan sortzen diren hezetasun eta kondentsazio arazoak konpontzeko, batez ere kantxan, kirolerako ohiko erabilera eragozten baitute. Horretarako egun pilotalekuak duen asfalto urtuzko zoladura kendu, eta hormigoizko oinarria mekanikoki leunduko dute, garbitu eta berrikusi ondoren.
Jokorako eremu bilakatuko da, eta pilota modalitate guztiak egin ahalko dira bertan.
Harmailetan dauden kaxak moldatuko dira, halaber, azaleraren neurri berrietara egokitzeko. Esku hartze horren ondoren, instalazioko harmaila teleskopikoaren erabilera erraztuko da.
Lanetarako 49.000 euroko inbertsioa egingo du udalak eta frontoia martxoaren bukaerarako erabilgarri izatea aurreikusi du lanak bukatuta. Bitartean, EPLEko pilotariek Euskal Ligako partidak Donostiako Atano III pilotalekuan jokatzen ari dira, eta gainerako kategoriak eta Pilota Eskola Oarsoaldeko pilotalekuak erabiltzen ari dira, Lezo eta Perurenakoa bereziki.
Horiei eskerrak eman dizkie udalak “erakutsitako lankidetzagatik”. Eskerrak ere, lanen ondorioak pairatzen ari diren elkarteei, “birgaitzea egiten den bitartean ulertu eta pazientzia izateagatik”.
