Orientazio Ligako proba, martxoaren 2an, Oiartzunen
Gipuzkoako ligako zortzigarren ekitaldiko lehen proba izango da. Nahi duenak eman dezake izena, bakarka, taldeka edo familian.
Txara parkea izango da orientazio proba egingo den guneetako bat. Gipuzkoako Orientazio Taldeak orientazio proba antolatu du martxoaren 2rako. Proba horrekin abiaraziko dute Gipuzkoako Herri Orientazioko Ligaren zortzigarren ekitaldia.
Banaka, taldeka edo familian har daiteke parte proba horretan. Haurtzaro Ikastolan, Txaran eta Mendibil inguruan egingo dute proba, eta norberak nahi duen zailtasunaren arabera har dezake parte.
“Momentu oro, orientatzen lagunduko duten elementuak (bide, ibai, eraikin etab…) hurbil izango dira, eta beraz esan daiteke hastapenerako orientazio proba egokia dela, oso”, adierazi dute antolatzaileek.
Gogorarazi dute trafikoa ez dela itxita egongo, eta, beraz, hori errespetatu behar dela. Bestalde, pasa ezinezko itxiturak edo harresiak egongo direla aurreratu dute, eta orientazio-araudiari jarraituta, ezingo direla horiek pasatu, proba ontzat emateko.
Probaren planoa zein izena emateko aukera, besteak beste, Gipuzkoa Orientazio Taldearen webgunean aurki daiteke.
Egitaraua
- 14:00etan: Harrera gunearen irekiera, Haurtzaro ikastolan.
- 14:30ean: Lehen irteerak.
- 15:00etan: Hasi berrientzako hastapen ikastaro laburra (15 minutukoa).
- 16:30ean. Azken irteerak.
- 18:00etan. Itxiera.
