Ane Santesteban Txirrindulari Sariaren lehenengoa, igandean
OTXEk antolatuta txirrindulari errenteriarraren izena daraman lasterketan Gazte eta Kadete mailako emakumeak ariko dira. Euskal Herriko aurreneko lasterketa izanik, parte hartze zabala espero dute.
Ane Santesteban Txirrindulari Sariaren aurkezpena. Argazkia: Herri Bizia
Ane Santesteban Emakume Gazte eta Kadete Mailako txirrindularitza Saria egingo dute lehenengoz igandean, OTXE Oarsoaldeko Txirrindularitza elkarteak antolatuta. Atzo arratsaldean aurkeztu zuten lasterketa. Euskal Herriko aurreneko lasterketa izanik, parte hartze handia espero dute antolatzaileek, hala esan zuten Arkaitz Iza eta Mikel Astarloza OTXEko ordezkariek, «batez ere, euskal taldeetako txirrindulariak izango ditugu».
Gazte Mailako txirrindulariak 16:00etan abiatuko dira Nafarroa etorbidetik—Zumardi paretik— eta Gaintxurizketara igoko dira, ondoren Lezora joateko, eta helmugatik pasako dira 16:15 aldera. Kadeteek, Errenteria-Oreretako irteeran egingo dute bat gazteen tropelarekin eta itzuli bera errepikatuko dute, helmugatik 16:30ean pasatzeko bigarrenez. Hirugarren itzulian, Oiartzun aldera joko dute txirrindulariek, Altzibarretik gora Fortalezako itzulia egin eta bariantetik Lartzabal auzora jaisteko. Gaintxurizketako itzulia egingo dute berriro eta helmuga 17:00etan pasako dute. Laugarren itzulian, Oiartzungo ibilbidea errepikatu beharko dute bi aldiz eta 17:30 inguruan helmugaratzea aurreikusi dute, lasterketa bukatzeko. Zumardian bertan egingo dute sari banaketa; kategoria bakoitzeko lehenengo hiru sailkatuek jasoko dute saria, baina horiekin batera, txirrindulari gehien helmugaratzen dituen taldea ere sarituko dute.
Esker ona boluntario eta babesleei
Antolatzaileek nabarmen jarri dute 15:00etatik 18:00etara txirrindularitza probak trafikoan eragina izango duela, «batez ere Galiziako biribilgunea eta Matxaingo biribilgunearen artean. Hori dela eta aipatutako errepideak saihestea gomendatzen dugu». Garraio publikoari ere eragingo dio, izan ere, Zumardia, Gabierrota eta Lartzabalgo geltokiak ez dira erabilgarri izango. Esker ona bukatzeko OTXEkoek Errenteriako Udalari, baita gainontzeko babesleei ere, «zuen laguntzarik gabe ezinezkoa litzatekeelako Errenteriako Ane Santesteban Txirrindulari Saria antolatzea. Baita lasterketaren egunean laguntzera Oarsoaldetik gerturatuko diren ia ehun boluntarioei ere. Biba zuek!».
