Herritarrek proposatuko dute aurtengo madalenetako omendua
Gaur aurkeztu duten aukeraketa sistema, iaz onartu zen herriko jaietan omenaldi sariak emateari buruzko ordenantza arautzaileen ondorioa da.
Aurtengo Madalen Jaietako omendua herritarrek proposatuko dute. Hala jakinarazi du gaur Aizpea Otaegi alkateak, udal ordezkaritza duten alderdi politiko guztietako bozeramaileekin batera egindako agerraldian. Horretarako, aurten, lehen aldiz, herritar batzorde bat sortuko da herritarrek omendu proposamenak egiteaz gain, azken erabakia ere eurek har dezaten. “Errenteriako Udalarentzat beti da garrantzitsua herritarrekin batera erabakiak hartzea”, esan du Otaegik.
Gaur aurkeztu duten aukeraketa sistema, iaz onartu zen herriko jaietan omenaldi sariak emateari buruzko ordenantza arautzaileen ondorioa da. araudi hori aurten sartu da indarrean, eta bere ekarpenen artean dago omendu proposamenak egiteko aukera herritar orori zabaltzea, eta azken erabakia ausaz aukeratutako herritar batzorde baten esku uztea, “Madalen jaiak herrikoiagoak izatea ez ezik, horrelako ekimenak bilatzen dute herritarrak udal kudeaketan parte hartzea modu berrietan. Ordenantza guztion adostasunarekin onartu dugu”.
Prozedura nolakoa izango den ere azaldu du alkateak. Udalerrian erroldatuta dagoen edozein bizilagunak proposamenak egin ahal izango ditu, herriko eragile eta elkarteek ere, eta alderdi politikoek ere bai. Horretarako martxo osoa izango dute, 1etik 30era zehazki. Beharrezkoa izango da udalak berariaz prestatutako eskaera betetzea eta hura aurkeztea, elektronikoki, edo Zu! zure udala arreta zerbitzuan.
Proposamen horiek guztiak jasota, hautagaien zerrenda egin, eta udaleko alderdietako bozeramaileen txanda helduko da orduan; osatutako zerrenda hiru hautagaira murriztu beharko dute-eta. Zerrenda hori, ausaz aukeratutako herritarren batzorde bati helaraziko diote, ondoren.
Herritarren batzorde hori osatzeko prozesua abiatuta du dagoeneko udalak gaur jakinarazi duenez. Udal errolda erabilita, eta betiere adina eta generoa kontuan hartuta, zozketa eginda 16 urtetik gorako biztanle guztien artean 800 pertsona aukeratzeko. Aukeratutakoek informazio gutuna jasoko dute, eta gonbidapena onartzen dutenekin sortuko da taldea. Hala ere, 16-20 pertsona artekoa izango da talde hori, ordenantzak hala zehaztuta, eta beraz, parte hartzeko gonbidapena onartu dutenen kopurua hori baino altuagoa balitz, bigarren zozketa bat egingo lukete.
Gutuna jaso dutenek baieztatu edo ezeztatu beharko dute parte hartzea martxoaren 15a baino lehen online formularioa beteta (egin klik hemen), edo Zu! Zure Udala zerbitzura deituta 943 44 96 00 edota 010 telefono zenbakietara.
Batzorde horrek bi bilera egingo ditu, lehena maiatzean. Batzorde horren zeregina azken erabakia hartzea izango da, hau da, aurretik adostutako hiru hautagaietatik bat aukeratzea; bukatzeko, erabaki horren berri emango diote udalbatzari.
Errenteriako udal arduradunek bereziki animatu dituzte herritarrak prozesu berrian parte hartzera, “euren proposamenak udalari helarazita edo, gonbidapena jasotzekotan, batzordean parte hartuta”.
