Atxilotu bat Lezon Reala-Benfica partida atariko liskarren harira
Beste atxilotu bat ere izan da, Usurbilen. Beste hamahiru lagun ikerketapean daude. Bultzadak gogor salatu ditu atxiloketak.
Azaroaren 8ko istiluak Donostian. Irudia bideo batetik ateratakoa da. Eusko Jaurlaritzako Segurtasun Sailak jakinarazi du 2023ko azaroaren 8ko Reala-Benfica Champions Leagueko partidaren atarian izandako liskarretan ustez inplikatuta daudelako bi pertsona atxilotu zituela atzo (asteazkena) Ertzaintzak. Horietako bat Lezon, bestea Usurbilen. Gainera, beste hamahiru lagun ikerketapean daudela zehaztu du. 21 eta 40 urtekoak dira bi atxilotuak. Ertzain etxean izapideak egin ondoren, epailearen aurrera ziren joatekoak biak. “Desordena publikoa, liskar nahaspilatsuan parte hartzea, eta lesioak eragitea” leporatu die poliziak. Amara auzoko Armeria plazan izan ziren istiluak, Benficako zaleek han zeuden realzaleak eraso egin zituztenean hasi ziren.
Bultzada realzaleen taldeak gogor gaitzetsi ditu atxiloketak, Irutxuloko HITZA-k jaso duenez. Sare sozialen bidez partekatutako komunikatuan azaldu dutenez, “denok ikusi genituen azaroaren 8ko irudiak. Ertzaintza babesten eta zaintzen ari zen plaza horri bi edo hiru aldiz eraso zioten Benficako zaleek, eta minutu batzuk lehenago, bi furgoneta zeuden toki beretik sartu ziren bertara”.
Bultzadak komunikatuan adierazi duenez, plaza horretan zeuden realzale batzuek euren burua eta gainerako realzaleena defendatu behar izan zuten. , “eta autodefentsa hori burutzeagatik ari dira orain jazarriak eta zigortuak izaten”. Gertakarien erantzukizuna Ertzaintzarena dela diote agirian: “Poliziak egun hartan izan zuen inakzioa eta arduragabekeria ikaragarriarengatik ari dira [realzaleak] atxilotu eta auzipetuak izaten”.
Protesta neurri bezala, biharko (ostirala) Realaren eta Vila-Realen arteko partidara joango ez direla adierazi dute Bultzadako kideek, eta Aitor Zabaleta harmaila itxiko dutela.
ERANTZUKIZUNA NORENA?
— Bultzada TxuriUrdina (@BultzadaTX) February 22, 2024
Taldeak azken orduetan jasandako errepresioa dela eta, bihar Bultzadak ez du zelaian animatuko eta harmaila itxita mantenduko du.
ADI egon eta elkartasuna antolatu!
Atxilotuak eta jazartuak ASKATU!
ERREPRESIORIK EZ! EZ GAITUZUE GELDITUKO! pic.twitter.com/o70N35vE9P
