Argitturrik auzoz auzo aurkeztuko du bere proiektua
Oiartzungo energia berriztagarrien komunitateak bazkideak biltzeko kanpaina darama aurrera. Bihar hasiko dira hitzaldiekin, Ugaldetxon.
Argitturrik, Oiartzungo energia berriztagarrien komunitateak, bazkideak biltzeko kanpaina abian du. Auzoz auzo aurkeztuko du bere proiektua, bihar —hilak 27, asteartea— hasi eta martxoaren 14ra arte egingo duen errondan.
Ugaldetxo izango da lehenengo geltokia, eta jarraian Arraguara joango dira, aste honetan bertan. Honakoa izango da egitarau osoa:
Hitzaldi informatiboak
- Ugaldetxo: Hilak 27, asteartea, 19:00etan auzoko lokalean.
- Arragua: Hilak 29, osteguna, 19:00etan, Aldeguna elkartean.
- Gurutze: Martxoak 6, asteazkena, 19:00etan, Bizardia elkartean.
- Karrika: Martxoak 7, osteguna, 19:00etan, Artaso elkartean.
- Ergoien: Martxoak 12, asteartea, 19:00etan, Auzokalte elkartean.
- Elizalde: Martxoak 13, asteazkena, 19:00etan, udaletxeko pleno aretoan.
- Altzibar: Martxoak 14, osteguna, 19:00etan, auzoko lokalean.
Gaur egungo energia sistema aldatu nahi dute, energia eskuragarri izan eta pobrezia energetikoari aurre egiteko. Herritarrak ahaldundu nahi ditu, Oiartzunen sortu eta kontsumituko den energiari buruz hitz egiteko. Sortuko duten energia berriztagarria izango dela argi dute. Pasa den ekainean elkarrizketa eman zioten HITZAri, proiektuaren nahiak azalduz.
