Beraun Planaren barruan kontratatutako pertsonak, lanean
Hamar lagun kontratatu dituzte, 23 eta 57 urte artekoak, bosna emakume eta gizon.
Beraun auzoa. Beraun Planaren barruan kontratatutako pertsonak lanean ari direla dagoeneko jakinarazi du udalak. 23 eta 57 urte arteko hamar pertsona dira, bosna emakume eta gizon eta Beraun Auzolanean proiektuarekin lotuta kontratatu ditu udalak. Iazko martxoan aurkeztu zuen udalak Beraun Plana: hiri berroneratze integraleko prozesuak, eta kolektibo zaurgarriak laneratzeko Beraun Auzolanean enplegu planak osatzen dute.
Beraun Auzolanean iniziatibaren helburu nagusia da Beraun auzoan kolektibo zaurgarriei zuzenduriko enplegu inklusiborako proiektu bat garatzea: “Egoera zaurgarrian dauden hamar pertsona eraikuntza sektoreko zenbait lanbidetan trebatzea eta horrela beren kualifikazioa eta enplegagarritasuna hobetzea, lan bilaketa arloan aktibatzea, eta Beraungo auzoan udala sustatzen ari den birgaitze prozesuan laguntzea ere badu helburu.
Hori horrela, lana eta formazioa uztartzen dituzten hamar lan kontratu egin ditu udalak; kontratatutako hamar pertsonetatik bost emakumeak dira eta bost gizonak, eta 23 eta 57 urte artekoak dira. Beste datu bat ere eman du udalak, horietako %80 iraupen luzeko langabeak dira. Oarsoaldea Garapen Agentziak egin ditu kontratazioak Errenteriako Udalaren laguntzarekin eta Eusko Jaurlaritzako Lan eta Enplegu sailak %100ean lagundu du iniziatiba.
Kontratatutako horiek guztiak lanean ari dira dagoeneko. 2023an hasi zen Beraun auzolanean proiektua aukeraketa prozesuarekin. 37 lagunek eman zuten izena eta horietatik 10 aukeratu zituzten. Hautatutako pertsonen prestakuntza etorri zen ondoren urrian eta azaroan, eta gaur egun lanean ari dira jada.
Programaren arduradunek “oso egokitzat” jo dute programa: “Lan merkatutik urrun dauden pertsonak dira eta interbentzio luzea eskatzen duen kolektiboa da. Hori horrela, 12 hilabeteko honelako programak oso egokiak dira”.
