Txistu doinuz beteko da martxoa ere
Gaztaño, Emakumeen etxea, Agustinak, Iztieta, Olibet eta Ugarritzen diana joko du Udal Txistulari taldeak martxoko igandeetan.
Igandero hutsik egin gabe egiten dute diana txistulariek. Udal Txistulari taldeak ez du atsedenik hartuko martxoan zehar, eta diana doinuak auzoz auzo eramango ditu igandero. lehen hitzordua, asteburu honetan bertan, Gaztaño auzoan du. Udaletxean hasiko dute ibilbidea 09:00etan eta Gaztañoko kaleetan barrena ibilita, udaletxean bukatuko du.
Martxoaren 10ean, berriz, Emakumeen Etxea bilakatuko dute agerleku emakumeei eskainitako kontzertuarekin. 12:30ean hasiko da emanaldia. Herriko emakume txistulariak, Lorea Intxaurrandieta abeslaria eta Nora Indakoetxea piano jotzailea izango dituzte lagun, eta aurkezle gisa, Axun Ertzibengoa Aizpiolea kazetaria ariko da; gaur egun hizkuntza normalizazioan ari da Ertzibengoa.
Hileko hirugarren igandea Agustinak auzoarena izango da. 09:00etan abiatuko dira txistulariak Gaztelutxotik. Bukatzeko, martxoaren 24an, Iztieta, Olibet eta Ugarritze auzoetan barrena zabalduko dituzte txistu doinuak, 09:00etan udaletxetik abiatuta.
