Pasaia eta Altzako topo geltokiaren arteko tunela, bukatuta
Antxon lurpeko topo geltoki berria sortu eta egungo zubibidea eraisteko "aurrerapauso bat gehiago" eman berri dela dio udalak. Gaur bukatu ditu hondeaketa lanak lurgorritze makina batek.
Urtarrila bukaeran topoko obrei egindako bisitan ateratako irudia da. Pasaia eta Altzako topo geltokia tunel bidez lotuta daude jada, gaur bukatu baititu hondeaketa lanak lugorritze makina batek. Eusko Trenbide Sareak (ETS) egindako azken lanen gaineko informazioa eman du udalak.
Altzako geltokiaren eta Pasaiako terminalaren arteko lineako tunela da bukatu berri dutena. Dena den, beheko azken metroa hondeatzea falta da, destroza izenekoa. Gaur egun, Gure Zumardia plazan pantailaren hormak bukatuta, geltokiko estalkia izango den goiko lauza egiten ari dira langileak. Aipatutako lauza hori bukatu ondoren, terminalaren hondeaketa lanei ekingo diete, lurpean, “hiri bilbearen gaineko eragina murrizteko”. Lan hauei esker, Hamarretxeta eta Eskalantegi arteko plazaren tartea berreskuratuko dute udarako herritarrek. Udaleko iturrien arabera, eremu horren etorkizuneko itxura herritarrek eta udal gobernuak “elkarlanean” diseinatuko dute, parte hartze prozesu baten bidez.
Udala eta SOS Antxo plataforma herrikoiak hilaren 14an izan zuten azken bilera ETSrekin. Bilera horretan, besteak beste, honakoa adostu zuten: irteera eta larrialdietako irteera etorkizuneko plazaren albo batean ezarriko dituela ETSk, eta ez erdialdean, hasierako proiektuan aurreikusi zen bezala. “Horrek antxotarrentzako eta pasaitarrentzako espazio zabal berria libre uztea ahalbidetuko du”, esan du Mikel Garcia Antxoko alkateordeak. Garciak aitortu du udalaren, ETSren eta antxoatarren arteko elkarlana “funtsezkoa” izan dela aisiarako gunea “ahalik eta libreen utzi ahal izateko”.
Galtzarabordako eremuari dagokionez, tunelaren instalazioei, araztegiari, dekantagailuei, lugorritze makina iristeko sarbideei eta bestelako lanei ekiten ari zaiela jakinarazi du udalak. Udalak aurreikusitakoaren arabera, puntu horretako hondeaketa hilabete bat eta bi hilabete barru artean hasiko da, eta urtebetez luzatuko dituzte lanak, puntu hori Pasaiako geltokiarekin lotu aurretik.
Altza eta Galtzaraborda arteko bi kilometroko tartea eraiki ondoren, topoak 7,5 minutuko maiztasunak eskainiko dituela hitz eman du ETSk.
Etorkizuneko geltokia
Antxoko etorkizuneko geltokia lurpean eraikiko dute, Gure Zumardia kalearen ondoko plazaren azpian hain zuzen. Eskalantegi kaletik sartuko beharko dira herritarrak. Larrialdiko irteera Hamarretxeta kalearen inguruan egingo da. Alboko nasak izango ditu geltokiak, baina eskailerak atari bakarrera iritsiko dira, eta bertatik atera beharko da kalera. Bi nasak igogailu bidez konektatuko dituzte.
