Fermiñeneko ate irekien ekitaldiaren xehetasunak eman ditu udalak
Gizarte-Ongizate Sailaren egoitza berria erakutsi nahi diete herritarrei, bihar. Herriko sortzaileek hartuko dute parte.
Oiartzungo Udalak Gizarte-Ongizate tokiz aldatu du: Fermiñenen ematen ari dira zerbitzua, udaleko bulegoak atzean utzita. Bihar arratsean —martxoak 1, ostirala— herritarrei toki berria erakutsiko diete, ate irekien ekitaldi baten bitartez.
Fermiñene, ongizatearen etxea. Zatoz, nahi duzunean izena jarri diote ekitaldi horri. “Herriko ongizatearen topalekua izango den etxe berria ezagutzeko aukera izango dute oiartzuarrek”, gonbidatu du udalak.
Biharko hitzorduaren xehetasunak eman dituzte. Ez da Fermiñenen hasiko, Kontzejupean baizik. Bertan, 18:30etik aurrera, herriko hainbat artista eta Ongizate Saileko langileak izango dira protagonista. “Sareez, arrakalez, hauskortasunaz, zaintzaz, laguntza eskatzeaz eta kohesioaz arituko dira”, iragarri du udalak. Hainbat herritar eta eragilerekin grabatu duten bideoa ere estreinatuko dute.
Ondoren, Fermiñenera
Kontzejupeko ekitalditxoa egin ondoren, orduan bai, abiatuko dira Fermiñenera. 19:00ak inguruan, egoitza berri eta berritua ezagutzeko parada izango dute oiartzuarrek.
Gunea ezagutu eta bertako txokoak bisitatzeko aukera izango da. Fermiñenen bertan luntxa izango dela jakinarazi du udalak, “elkar ezagutzen eta sareak josten jarraitzeko”.
