Sanpedrotarra eta Albaola, elkarrekin arraunean
Lankidetza hitzarmena sinatu berri dute bi aldeek lehen aldiz. Albaola klubaren esanetara jarri da, "egungo mailari eutsi ahal izateko finantzaketa lortzeko behar duen guztian laguntzeko".
Isasa eta Agote. Sanpedrotarra Arraun Elkarteak eta Albaola Itsas Kultur Faktoriak indarrak batu dituzte, lankidetza hitzarmena sinatu berri dute bi aldeek lehen aldiz. Klubeko presidente Xabier Isasak eta faktoriako presidente Xabier Agotek irudikatu dute hitzarmen hori. Hitzarmenak “bi erakundeek formalizatu nahi duten eta saihestezina den sinergia natural bat” lortu nahi duela diote klubeko eta faktoriako iturriek.
Aliantza honi esker Albaolak “gaur egungo arraun mundua ezagutuko” duela diote bi aldeek, eta hori dela eta, Albaolak “arrauna sustatzeko” konpromisoa hartu duela, “ez bakarrik norgehiagoka alderdiari dagokiona, bai eta itsas kultur ondarearen zati garrantzitsu denaren gisa ere”. Albaola klubaren esanetara jarri da, “egungo mailari eutsi ahal izateko finantzaketa lortzeko behar duen guztian laguntzeko”.
Aurrerantzean Albaolaren logotipoa klubeko euskarrietan agertuko da, eta faktoria sustatzeko ekintza puntualak egingo ditu klubak, “itsaso eta kultura ondarea berreskuratzeko, transmititzeko eta zabaltzeko egiten duen lanaren berri emateko”. Honez gain, arraunaren ezagutzan eta zabalkundean sakontzen laguntzen duten ekintza guztietan lankidetzan aritzea adostu dute bi aldeek.
