Lokal hutsak mobilizatzeko aurrekontua zabaldu du udalak
Eskaerek gora egin dutela ikusita, udalak 90.000 euro gehiago bideratuko ditu programara. Orain artean, 36 lokal mobilizatu dituzte.
Duela bi urte udala, tokiko jarduera ekonomikoa sustatzeko, lokal hutsen mobilizaziorako diru laguntzak ematen hasi zen. 2022an, bi urterako 200.000 euroko aurrekontua adostu zuten, baina eskaerek etengabean gora egin dutela ikusita, 290.000 eurora zabaldu dute aurrekontua. Diru laguntzak Merkataritza Planaren baitan daude jasota, eta hasieratik hainbat helbururi erantzun diete.
Hala nola, hiriko ekonomia-sarean negozio berriak jartzeko, orain artean errentagarriak izan diren negozioei jarraipena emateko, lokalak zein merkataritza-gune hutsak mobilizatzeko, eta kaletik zuzeneko sarbiderik ez duten instalazioetan dauden negozioei kaleko irteera emateko balio izan dute.
Orotara, 36 lokal mobilizatu dituzte horrela: 20 lokal berri ireki dira, 10 negozio jaitsi dituzte kale mailara, eta 6 lokal baliatu dituzte negozioen transmisiorako.Onuradunek gehienez ere 9.500 euro jaso ditzakete, lokal hitsaren prestaketa eta mobilizaziorako, alokairu edo erosketarako edo beste hainbat aldagaien arabera (euskarazko arreta bermatzea, emakumeen parte hartzea sustatzea, etab.)
Aurrerantzean, programak jarraipena izango du. Izan ere, 125.000 euro bideratuko dira 2024ko deialdira. Maiatzean irekiko dute.
