Konpromiso zehatzik ez du hartu Osasun sailburuak "ahalmenik" ez duela adierazita
Aizpea Otaegi alkateak eta Bernar Lemos eta Maite Gartzia lehen eta bigarren alkateordeek, Gotzone Sagardui Osasun sailburuarekin bilera egin dute.
Osasun sailburuarekin bilera egin dute gaur Aizpea OAtegi alkateak, Bernar Lemos lehenengo alkateordeak, eta Maite Gartzia bigarren alkateordeak, Iztietako anbulatorioaz hitz egiteko. Iztietako anbulatorioaren egoeraren gaineko kezka Osasun sailburuari jakinarazi dio aurrez aurre gaur Aizpea Otaegi alkateak. Otaegik berak, Bernar Lemos lehenengo alkate ordeak, eta Maite Gartzia bigarren alkateordeak bilera egin dute Gotzone Sagardui sailburuarekin. Herritarren kezka bere eginda, eta herritarrek beraiek joan den abenduaren 16an egindako manifestazio erraldoiaren harira eskaera zuzena egin zioten Otaegiri esku har zezala eta bitartekari lanak egin zitzala egonezina Osasun sailburuarengana eramateko.
2024ko urtarrilaren 30eko udalbatzaren ohiko bilkuran herriko 11 auzo elkarteek, mugimendu feministak, Bilgune Feministak eta Duintasuna elkarteak Iztietako anbulatorioaren defentsa egiteko mozioa aztertu zuten alderdi politikoek. Udalbatzaren babes zabalarekin onartu zen mozio hori, 18 aldeko botorekin (EH Bildu, PSE-EE, Elkarrekin Errenteria eta PP) eta EAJ ekuaziotik kanpo gelditu zen, abstentzioaren alde eginda.
Mozio horrek, bere bosgarren puntuan onartu zuen, Errenteriako Udalak konpromisoa hartzen zuela arazoa konpontzen lagun zezaketen kudeaketak egiteko, bai eta mozio horretan hartutako erabakiak Eusko Jaurlaritzari eta Osasun sailburuari bidaltzeko ere. Konpromiso horri erantzunez, gutuna helarazi zion alkateak Osasun sailburuari bilera eskaera eginez otsailaren 9an. Erantzunik jaso ez zuenez, bigarren gutun bat ere bidali zuen Otaegik Sagarduiri.
Otsailaren 21ean erantzun ziola sailburuak alkatearen gutunari azaldu du udalak, eta Sagarduik esandakoak hitzez hitz jakinarazi ditu: “Errenteriako Udalak urtarrilaren 30eko osoko bilkuran lehen mailako arretaren egoera dela-eta hartutako erabakiaren harira, gure gaitzespenik irmoena adierazi nahi dugu”. Gaitzespen hori bi arrazoiren gainean oinarritu zuen sailburuak bere erantzunean, hemen hitzez hitz Sagarduik erantzundakoa: “Segurutzat jotzen da lehen mailako arretak dituen zailtasunak bilakaera probokatu eta interesatu baten emaitza direla; eta hori guztiz faltsua da”.
Emandako bigarren arrazoian, berriz, zailtasunen jatorriari egin dio erreferentzia, medikuntza profesionalen falta eta Espainiako Estatuko Gobernuari aipamena eginez: “Estatuko Gobernuak, gaian eskumena duenak, ez zuela aurreikusi gaur egun erretiroa hartzen ari direnen lanpostuak betetzeko beharko liratekeen profesionalen kopurua”.
Osasun delegazioan izan dute bilera gaur alkateak eta bi udal ordezkariek Osasun sailburuarekin, Bilbon. Ez du konpromiso zehatzik hartu Sagarduik, hala jakinarazi dute udal ordezkariek, horretarako ahalmenik ez duela adierazita, “Iztietako anbulatorioko egoera hobetzeko konpromisoak eskatu badizkiogu ere, igorritako gutunean adierazitakoak berretsi ditu”.
Gauzak horrela, Iztietako anbulatorioko egoera Osakidetzako bakanteak osatzeko martxan dauden neurrien menpe gelditzen da.
Gotzone Sagardui Osasun sailburuak bidalitako erantzuna hemen klikatuta irakur daiteke osorik.
