Pentsio duinen aldeko aldarria Korrika egin dute
Gazte izanen lehen korrika egin dute gaur pentsiodunek euskara ere euren aldarrien artean sartuta. Irudi ederrak utzi ditu euskararen eta pentsio duinean alde gaur egin duten aldarriak.
Iruid ederrak utzi ditu Gazte Izanen Lehen Korrikak. Gabierrotako zaharren egoitzako egoiliarrak lekukoa eramaten. Gazte izanen lehen korrika egin dute gaur. Duintasuna elkarteak elkarretaratzea egin du lehenik, eta haren ostean egin ohi duen manifestazioa, euskararen aldeko iniziatiba bilakatu du; hori bai, ez da jai giroan egin duten gazte izanen korrikan falta izan pentsiodunen aldarrikapenik.
1080 euroko gutxieneko pentsioen aldarria presente, eta horrekin batera, denontzako zaintza duinaren aldekoa. Eusko Jaurlaritzak eta foru aldundiek sinatutako Zainketen Aldeko Herri Ituna izan dute hizpide bildutakoek salatzeko oraindik ere ez dakitela zertan datzan, “14 konpromiso dituzte, orokorkeriaz jasotzakoak, eta ez dute ekintza zehatzik adierazten. Zaintze sistema publiko, unibertsal eta kalitatezko bati buruzko aipamenik ere ez dute egiten”. Bi aldarrikapen zehatz egin dituzte bildutakoek, gutxieneko pentsioak 1.080 eurora arte 14 ordainsaritan osatzeko eta guztientzako zaintza duinak bermatzeko etxean eta egoitzetan. Azken hori ezinezkoa dela egungo politikekin jarri dute mahai gainean pentsiodunek, “100 eta 500 euro arteko txeke bat ematen dute erakundeek, familiako emakume batek mendekoen arretaz arduratzeko. Gainera. lurraldearen arabera diru sarrera hori ezberdina da. Askotan emakume migratu bati, benetan zaintzaz arduratzen dena, ordaintzeko izaten da. Hori ez da zaintza duina, ez zainduarentzat, ez zaintzailearentzat”.
Etxeko zaintzak “profesionalizatua, integrala eta kudeaketa publiko bidezkoa” behar duela esan dute.Egoitza eredua aldatu beharra ere defendatu dute bildutakoek, “egoitza txikiak eta gure inguruan kokatutakoak nahi ditugu, bateragarria izan behar da herri edo auzo harremanak izatearekin”. Ezinbestekoa da, gainera, Duintasunarentzat, zaintza hori kalitatezkoa izatea, “lehentasuna kalitatezko zaintza da eta ez enpresa kudeatzaileen negozioa, horregatik, zaintza zerbitzuen kudeaketa publikoa eskatzen dugu”.
Martxoaren 8ari ere keinu gaurko elkarretaratzean Duintasunako kideek. Mugimendu feministak antolatutako mobilizazioetan parte hartzera deitu du pentsiodunen elkarteak.
Bukatzeko gertuagoko bi gairi egin diete erreferentzia. Batetik E15 autobus linea leheneratzeko urratsak egin dituztela azaldu dute, eta jomugan dutela halaber, E05 autobusa, “horren frekuentzian aldaketak egin nahi dituztelako. Gure mugimenduaren eta protesten bidez, diputatua auzo, pentsiodunen eta pentsiodunen elkarteekin bilera egitea lortu genuen joan den astean eta konpromisoa hartu du linea mantenduko dela”. Aurreko asteko plenoan luze jo zuen gai horren gaineko eztabaidak.
Iztietako anbulatorioaren egoera ere izan dute hizpide. Izan ere, Duintasunak jakinarazi deunez, gaur bildu da Aizpea Otaegi alkatea Gotzone Sagardui Osasun sailburuarekin. Sagarduik udalari emandako erantzunaren berri eman dute eta gogor salatu sailburuaren jarrera eta bertan egin dituen adierazpenak. Plenoak Iztietako anbulatorioaren egoeraren gainean hartutako erabakiari “gaitzespenik irmoena” azaldu du Sagarduik udalera helarazitako gutunean. Horretarako bi arrazoi eman ditu Sagarduik, “segurutzat jotzen da lehen mailako arretak dituen zailtasunak bilakaera probokatu eta interesatu baten emaitza direla, eta hori guztiz faltsua da”. Sailburuaren aburuz, Iztietako anbulatoriaren egoera Araba Bizkai eta Gipuzkoa osokoaren, Espainiako Estatukoaren, eta Europako zati handi batekoaren berbera da.
Bigarren arrazoia, familiako medikuntzako espezialista nahikorik ez dagoela dela esan du idatzi horretan, plaza hutsak betetzeko. Gaurko bilerak zer emango duen zain direla azaldu du Duintasunak, baina argi azaldu du lorpen denak mobilizazio jendetsuari esker izango direla.
Korrika kalez kale
Gazte izanen lehenengo korrikari ekin diote ondoren. Poliki eta lekukoa eskuz esku egin dute bidea, Herriko Plazatik Matxaingo biribilgunera Erdiko eta Santa Klara kaleetatik barrena. Matxainen, Gabierrotako zaharren egoitzako hainbat egoiliar zituzten zain eta txaloka hartu dituzte pentsiodunak lekukoa hartzeko ondoren. Nazional errepidetik Zumardia pasa eta Fernandez Landa plaza paretik Biteri kalera pasa dira; Koldo Mitxelenako ikasleak jolasgaraian ziren eta txaloka hartu dute Gazte izanen korrika. Foru plazan bukatu dute beraien neurrira egindako euskararen aldeko lasterketaren lehen ekitaldia, eta gelditzeko etorri dela baieztatu. Mezua irakurri dute bertan, eta Xenpelar AEK-ko irakasleen esker ona jaso dute, “eskerrik asko egiten ari zareten lana oso handia delako gazteagoak garen belaunaldiei etorkizun hobeagoa uzteko”.
Hamaiketako ederra zuten zain bukaera behar bezala ospatzeko.
