'Bantzan', musika dantzan jarriko duen ikuskizuna
EMKE Musika Banda eta Ereintza Dantza taldeak ikuskizuna ondu dute elkarlanean, 'Bantzan'. Emaitza, hilaren 23an eramango dute agertoki gainera.
Bantzan ikuskiuzna aurkeztu dute EMKE Musika Bandak eta Ereintza Dantza taldearen elkarlanetik sortutakoa. Argazkia: Herri Bizia EMKE Musika Banda ikuskizun berritzaile batekin dator. Ez du bakarrik egin bidea, Errenteria-Oreretako beste eragile bate eskutik, baizik, Ereintza Dantza Taldearekin, zehazki. Fusio horren emaitza da Bantzan musika banda eta dantza elkarri lotuta erakutsiko dituen dituen ikuskizuna.
Atzo aurkeztu zuten eta xehe azaldu zertan datzan. Bi eragileen eskutik sortutako ikuskizunera, Euskal Herriko dantza eta musika bildu dituzte, zehazki, Gipuzkoa, Behe Nafarroa eta Zuberoakoak. Errenteriako Musika Kultur Elkarteak. EMKEk sortutako Gure bakarlariak zikloaren barruan kokatuta dago ikuskizun berria eta bi helburu nagusi dituela azaldu dute: “Herriko bi kultur eragileren elkarlana sustatzea batetik dantza eta musika uztartuta; eta Euskal Herriko dantzen doinuak eguneratu eta armonizatzea, ohiko instrumentazioez harago, instrumentazio zabalago eta aberatsagorantz gidatuz proiektua”.
Ez da elkarren arrimuan egiten duten lehen lana, aurretik elkarlan ugari egin dituzte musika bandak eta Ereintza Dantza taldeak, baina formatu txikikoak izan dira, gehienez jota lau dantzarirekin. Aspaldikoa zela talde osoarekin ikuskizuna egiteko asmoa nabarmendu dute, “iaz harremanetan jarri eta Bantzan martxan jarri genuen”.
Azken emaitza, hilaren 23an gozatzeko aukera izango da, 19:00etan Lekuona Fabrikan antolatu duten emanaldia. Sarrerak 7 euro balio ditu eta hilaren 8an, ostiralarekin jarriko dituzte salgai online (egin klik hemen) eta Lekuona Fabrikako harreran bertan. Zuzendari, aitor Mitxelena Rubio ariko da.
Ereintza Dantza Taldearentzat aukera ederra izan da Bantzan, “Euskal Herriko dantzak EMKERekin batera taularatzea ederra izango da”. Urteroko emanaldiak “herrikoiagoak” eta “informalagoak” izaten direla aitortuta, elkarlanean ondutako ikuskizunak, antzoki formatuko emanaldi bat eskaintzeko aukera emango dio dantza taldeari, aspaldiko partez, “oso motibagarria da guretzat”. Gogotsu. Hala dira Ereintzako dantzariak, “EMKE bezalako musika banda batekin oholtza berean egoteak, gure errepertorioan egon ohi ez diren dantzak egiteko aukera emango digu eta oso gogotsu gaude”.
Maite Gartzia Kultura zinegotziak, esker ona EMKE eta Ereintza Dantza Taldeari, “eskainiko diguten ikuskizunarengatik. Oso garrantzitsua da guretzako, Errenteriarentzat, kultur eragileen arteko elkarlana. Zubi eta sare horietatik gaur aurkeztu duten lanaren emaitza oso potente, aberasgarri, eta berritzailea izango da”.
Errenteria Kultura dela erantsi du Gartziak, “kultur eragileek osatutako ekosistema zoragarri bat”.
Guztiek deitu dituzte herritarrak parte hartzera eta elkarlanetik sortutako ikuskizunarekin gozatzera.
