Eraso matxista gaitzetsi dute udal talde politiko guztiek
Bat egin dute Oreretako Asanblada Feministak bihar (osteguna) deitu duen elkarretaratzearekin; 19:00etan izango da, Herriko Plazan.
Oreretako Asanblada Feministak Errenteria-Oreretan jazotako eraso matxista baten berri eman zuen atzo sare sozialen bidez. Nazkatuta eta nekatuta, halakorik ez dutela onartuko esango dute ozen biharko deitu duten elkarretaratzean. Herriko Plazan izango da, 19:00etan.
Errenteriako Udaletik ere heldu da gaitzespena herrian izan den azken eraso matxistaren harira. Udaleko talde politiko guztiek, adierazpen instituzional bateratua plazaratu dute eraso matxista “gaitzetsi” eta indarkeria matxistaren aurrean zero tolerantzia adierazteko. Enegarrenez esan dute udal talde politikoek ez dituztela horrelako gertaerak onartzen, eta konpromisoa berretsi dute, erakunde gisa, lanean jarraitzeko “indarkeria matxistarik gabe bizi gaitezen”.
Herritarrei eskaera zehatza egin diete, gizonei bereziki, adi beha ditzaten euren jarrera eta jokabideak, eta edonolako erasoen aurrean jarrera aktiboz joka dezaten.
Erasoa jasan duen emakumeari “elkartasuna eta babesa” adierazi dio udalak, eta halaber, dituen baliabideak haren eskura jarri ditu. Bukatzeko, erasoa gaitzesteko Errenteria-Oreretako Mugimendu Feministak deitu duen elkarretaratzearekin bat egin du Errenteriako Udalak; bihar, osteguna, izango da 19:00etan Herriko Plazan, eta herritarrak ere parte hartzera deitu ditu.
