Gaurtik, motora Mugin
Tarifa 0,48 eurokoa izango da bidaia bakoitzeko. Alkateak "eskaera historiko" bati erantzuna eman zaiola adierazi du.
Donibane eta San Pedro lotzen dituen txalupa, badiaren erdian Gaurtik, 2024ko martxoaren 6tik, Mugi txartel integratua erabili ahal izango da San Pedro eta Donibane (eta alderantziz) batzen dituen motoran. Tarifa 0,48 eurokoa izango da bidaiako (orain arteko prezioa 1,10 eurokoa zen), hiri barruko autobus publikoek dutena, alegia. Atzo iragarri zuten neurria Pasaiako alkate Teo Alberrok eta Gipuzkoako Mugikortasun diputatu Azahara Dominguezek, bakoitzak bere aldetik. Alkatearentzat “pasaitarren eskaera historiko bat” erantzuna izan da. Dominguezentzat, berriz, beste urrats bat izan da “Estatuan aitzindaria eta erreferentziazkoa izango den tarifa sistema bat izan dezagun gipuzkoar guztiok”.
Xehetasunei begira, tarifa murriztuaz gain, 6 urtetik beherako erabiltzaileek doan izango dituzte bidaiak. Gainera, aurretik jakina zen bizikleten bidaia debaldekoa izango zela. Motoran txartela erabili ondoren Mugi barruko beste garraiobide publiko bat erabiltzen bada, doakoa izango da lotura edo trasbordoaren bidaia. Hartara, gainerako garraiobideetan aplikatzen zaizkien deskontu eta hobariak ere probestu ahalko dituzte Pasaiako ontzi zerbitzuaren erabiltzaileek baldin eta ordainketa Mugirekin egiten badute: urtean 100.000 erabiltzailek baliatzen dute motoraren zerbitzua.
Mikel Garcia Pasaiako Udaleko Mugikortasun zinegotziak nabarmendu du neurri horri esker pasaitarren eguneroko mugikortasuna hobetuko dela, “eta hainbestetan eskatu dugun intermodalitatea ahalbidetuko da”. Mugikortasun iraunkorraren bidean urrats sendoa egin dela uste du Garciak, eta Mugik inplizitu dituen onura ekonomikoak goretsi ditu.
Hasiera batez Gipuzkoako Garraio Agintaritzak eta zerbitzua kudeatzen duen Itsas Zerbi enopresak lau urterako akordioa izenpetu dute, zortzi urtera luza daitekeena.
