Hasi dira oraina borrokatzen, moretik
Mundu bat bildu da Oreretako Mugimendu Feministak deitutako manifestaziora, eta aldarri feministek hartu dituzte kaleak, indar biziz.
Ehunka lagunek aldarri feminista atera dute kalera. Mundu bat bildu da Oreretako Mugimendu Feministak deitutako manifestaziora, eta aldarri feministek hartu dituzte kaleak, indar biziz. Manifestazioa zabaltzen, bandera feminista eta Palestinako bandera elkar hartuta. Oraina borrokatzera datozela esan dute faxismoaren hazkundea nabarimen-nabarmena den testuinguru betean ere, sinistuta gero eta gehiago direla, “erratzik gabe hegan egiten dugun sorginen akelarrera batu garenak, molestatzen dugunak, komeni dena baino gehiago dakigunak, eta egungo gizartearen zimenduak ezbaian jartzen ditugunak”.
Emakumeek historian etengabe izan direla jazarriak salatu dute gaurko protestan, “etengabe eraso gaituzte, eta aurten ere ez dira gutxi jasan behar izan ditugunak”. Puntu horretan erreferentzia azken egunetan Errenteria-Oreretan izan den eraso matxistari, “atzo bertan bortxaketa bat salatu genuen”. Nazka eta neketik galdera zuzena egin dute: “Noiz arte jasan beharko dugu gure gorputzetan terrorismo hau? Kontzientzietan eragiten ari bagara ere, indarkeria matxistaren haria ez da eten, bortxatutako eta erasotako emakumeen ondorengoak gara, eta gure ondorengo emakumeak ere hala direla ikusten ari gara. Noiz arte?”.
Indarkeria aipatuta, begirada zabalago bati ireki diote leihoa gaurko mobilizazioan elkartasunaren bidean Palestinari keinu egiteko, salatzeko Israelek bereziki jarri dituela emakumeak jomugan, “bizitza beraren emaile potentzial edo erreal gisa, ema eta zaintzaile gisa. Israelek badaki honek duen garrantzia Palestinaren etorkizunean. Israel emakume palestinarrek bizitza sozial eta kulturalean duten garrantziaz jabe da; emakume palestinarrei eraso egiteak bizitza sozial eta politiko indigenaren suntsipena dakar”.
Argi esan dute: “Palestina ere bada auzi feminista”.
Bizi baldintzen gogortzea
Azken urteetako bizi baldintzei ere begirada mugimendu feministatik gaurko protesta nagusian. Horien gogortzea aipatu dute, “krisi ekologikoa, bizitza garestitzea, prekarietatea nagusitzea… Aberatsagoak aberatsago eta pobreak pobreago”. Banketxe eta energia enpresen irabaziekin parez pare jarri dute sistema publikoa: “Lehenenek irabazi historikoak izan dituzte, osasuna eta hezkuntza publikoa, oinarrizko zutoinak eta bizitzaren eusleak berriz, kolokan dira”.
Iazko azaroko Greba Feminista Orokorrari ere aipamena egin diote, ezinbestean, Euskal Herriko lehena izan delako, “mugimendu feministaren lidergoarekin eta Euskal Herriko gehiengo sindikalaren babesarekin, 1.500 langile batzorde baino gehiago batu ziren grebara, eta hezkuntzan, garraioan eta komunikabideetan erantzun handia izan du. Zaintza erdigunean jarri du grebak bi erpin nabarmenduta: ordaindua ez den lana familiaren eremu politiko eta sozialean ematen dena, eta ordaindutako lan prekarioa, sektore feminizatuek egiten dutena. Eztabaida ugari egiteke ditugu zaintzaren bueltan: publikoaren nolakotasunaren gainean, komunitatearen gainean, baita biak nola lotu erabakitzeko arlo publiko komunitarioa bat izan dadin. Greba feminista orokorra irteera puntua baino ez da izan, bide luzea dugu aurretik”.
Bukatzeko, borrokarako deia egin du mugimendu feministak: “Emakume feministok saretu, parte hartu, antolatu eta kalera atera gaitezen. Historia osoan zehar eraso eta jazarri gaituzte, baina kontuz, sua kontrolatzen ikasten hasiak gara-eta”. Palestinako borroka eta borroka feministaren aldeko oihuekin bukatu dute gaurko protesta bildutakoen txalo zaparrada artean.
