Iker Dorronsoro, Touringeko gizonen entrenatzaile berria
"Kirol egoera iraultzeko" helburuarekin, klubak Gari Argote eta David Brun kargugabetu zituen asteartean. Iker Dorronsoro izango da gizonen lehen taldearen prestatzailea denboraldia bukatu bitartean.
Argazkia: Touring KE. Touring Kirol Elkarteko Zuzendaritza Batzordeak Gari Argote eta David Brun entrenatzaileak kargugabetzeko erabakia komunikatu zuen asteartean. Gorritxoen gizonen lehen taldea beheko postuetan dago, jaitsiera postuetatik hiru puntura, eta “kirol egoera iraultzeko” helburuarekin, klubak bi prestatzaileak kargugabetu ditu. Touringek eskerrak eman dizkie klubean egindako “lanagatik, eskaini duten konpromisoagatik eta arduragatik eta klubarengatik eman duten guztiagatik”. “Munduko zorte guztia” opa die biei etorkizunerako, eta Touring “betiko beren etxea” izango dela adierazi du klubak.
Argotek eta Brunek dagoeneko badute ordezkoa Fanderiako aulkian. Kubak jakinarazi du Iker Dorronsoro Triki izango dela gizonen lehen taldearen prestatzailea denboraldia bukatu bitartean. Dorronsorok bihar (larunbata) zuzenduko du gorritxoen lehen partida. Touringek arerio zuzena den Anaitasuna jasoko du Fanderian, 16:30ean. Gorritxoak sailkapeneko 14. postuan daude, 23 punturekin. Azkoitiarrak, aldiz, 15. dira, 21 punturekin. Oreretarrek neurketa garrantzitsua dute aurretik daramaten bolada txarra irauli eta beheko postuetatik ihes egiteko.
