Lentzeriaren gaineko erakusketa Jantziaren Zentroan
Jantziaren Zentroak erakusketa berria zabalduko du bihar, larunbata. Lentzeria, emakumearen ezkutuko sekretua izenburupean, XVI. mendetik hasi eta 1930 urtera arte emakumeek erabiltzen zuten barruko arropa erakutsiko du bertan.
![](https://oarsoaldea.hitza.eus/site/files/2024/03/lentzeria-2.jpg)
Jantziaren Zentroak erakusketa berria zabalduko du bihar, larunbata. Lentzeria, emakumearen ezkutuko sekretua izenburupean, XVI. mendetik hasi eta 1930 urtera arte emakumeek erabiltzen zuten barruko arropa erakutsiko du bertan. “Garai bakoitzean, emakumearen gorputza modak inposatutako silueta ezberdin batera moldatu da, armazoi edo kaiola eta jantzi bereziak erabiliz”, azaldu dute antolatzaileek.
Erakusketara bildu dituzten XVI mendetik 1880 urtera bitarteko barruko jantziak erreplikak dira, XVI eta XVIII mendeetako tontilloak, XIX mendeko krinolina eta polisoiak, zehazki. 1880-1930 arteko lentzeria, berriz, jatorrizko jantzien bidez ikusi ahalko da: kortseak, kortse estalkiak, pololoak, galtzerdiak, barruko gonak, kamisoiak…
Barruko arropak historian zehar izna duen garapena hainbat azalpen testuetara eraman dute, gainera, erakusketa osatzeko, eta lentzeriaren bost mendeetako ibilbidea azaltzeko bisita gidatuak ere antolatu ditu zentroak.Ordu erdikoak izango dira bisita horiek, 4 euroren truke, apirilaren 11n 19:00etan gaztelaniaz, eta apirilaren 14an 11:00etan euskaraz. Parte hartzeko izena eman behar da (egin klik hemen) edo Errenteria-Oreretako turismo bulegoko 943 49 45 31 telefono zenbakira deitu.
“Erakusketaren bidez, denboran atzera egin eta emakumea ahotsik, iritzirik edo erabakitzeko ahalmenik gabeko objektu ‘apaingarri’ soila zen garaian murgilduko gara. Itxura ederra eman, eta familiaren estatus sozialaren ispilu izan behar zuen”, azaldu dute. Bidaia hori, 1930ean amaituko dute, Lehen Mundu Gerraren ostean, “emakumea lan munduan murgildu eta bizitzeko, mugitu ahal izateko, loturarik gabeko barne arropak erabiltzen hasi zen unera arte, barruko armazoi, kaiola eta kortseak desagertu eta arnastean hasi zen unera arte”.
Bihartik apirilaren 28ra arte izango da zabalik erakusketa berria Kapitain etxearen beheko solairuan. Larunbatetan 11::00etatik 14:00etara eta 17:00etatik 20:00etara, eta igande eta jai egunetan 11::00etatik 14::00etara. Aste Santuan, berriz, ostegun, ostiral eta pazko astelehenean ere zabalik izango da Jantziaren zentroa 11:00etatik 14:00etara.