Euskararen arnaserako pagoa landatu dute
Katxiporretak emandako pagoak sustrai sendoak emango ditu Euskal Herria plazan. Xabier Tubilla euskaltzalea omendu dute ekitaldian.
Lezoko Korrika Batzordeak 23. Korrikaren aurretik prestatutakoen artetik lehen ekitaldia atzo arratsaldean egin zuten. Katxiporretak emandako pagoa landatu zuten Euskal Herria plazan. “Eskerrik asko gurekin euskarari arnas ematera etorri zareten guztioi. Euskal Herria plazako parkean sustrai sendoak emango ditu, gure hizkuntzak bezalaxe”, esan dute Oroitzene AEK-ko kideek.
Izen propio bat nabarmendu zuten ekitaldian: Xabier Tubillarena. Aurten zendu da euskaltzale lezoarra, eta haren omenezko aitortza hitzak izan zituzten atzoko ekitaldian. “Aurten ez zara gurekin egongo fisikoki, baina gurekin izango zaitugu aurtengo Korrikan ere”.
Ostegunean (hilak 14) hasiko da 23. Korrika Irunen. Lezora hilaren 23ko gaualdean iritsiko da, 23:30 inguruan. Atzoko ekitaldia, nahiz beste asko, AEKren sostengurako martxa ibiltari erraldoiari hauspoa emateko baliatu nahi dituzte. Behean, Korrika Batzordeak landutako jarduerak.
- Bihar (martxoak 9, larunbata). Goiz-eguerdian, Gurutze Santuaren plazan, kuestazioa eta peto nahiz banderolen salmenta gunea. Photocall-a ere jarriko dute.
- Martxoak 13 (asteazkena). 18:15ean, Oroitzene AEKn, Harro herri kantu tailerra.
- Martxoak 15 (ostirala). 19:00etan, Oroitzene AEKn, petoen banaketa eta brindisa.
- Martxoak 21 (osteguna).
- Goizean, Lezoko Renfeko geltokitik abiatuta eta plazarantz, Dinokorrika (adinekoen Korrika).
- 19:00etan, Gezala Auditoriumean, Lander Garroren Oihaletxea dokumentalaren emanaldia, eta solasaldia.
- Martxoak 22 (ostirala).
- 12:00etan, Pasaia-Lezo Lizeoaren Donibaneko egoitza nagusitik abiatuta eta Lezorantz, Korrika Gaztea.
- Arratsaldean, Goiko Plazatik abiatuta, Korrika Txikia.
- Martxoak 23 (larunbata). Korrika Lezora iritsiko da gauean. Aurretik, baina, egun osoko egitaraua prestatuko du Korrika Batzordeak (aurrerago emango dituzte egitarauaren xehetasunak). Horren barruan soka-tira txapelketa antolatu dute, 16 urtetik gorakoentzat, eta gutxienez sei kideko taldeekin. Soka-tiran parte hartu nahi duten kuadrillek 626 146 639 telefono zenbakira deitu behar dute izena emateko.
- Martxoak 24 (igandea). Baionako bukaerara joateko autobusak aterako dira Oarsoaldetik. Horien gaineko xehetasunak hemen.
