Duten indarra kalera atera dute
Martxoaren 8ko manifestazio jendetsua egin dute Lezon. Borroka feministak merezi duela eta beharrezkoa dela aldarrikatu dute.
Jende asko. Andana. Betekada gaur arratsaldean Lezoko Martxoaren 8ko manifestazioan. Gurutze Santuaren hasi da martxa, eta herri osoari bira eman ondoren, Karlos Saldisen hartu du atseden Emakumeen Eguneko mobilizazioak. Emakume asko eta asko. Baita gizonak ere. Haurrak, gazteak eta helduak. Denak bat. Berdintasunaren eta borroka feministaren aldeko oihuak, Lezo osotik zabaldu direnak, Saldisen bukatu dira. Han egunaren irakurketa egin dute, eta ondoren, dantzaldia: etxeko lanetan eta zaintzan ibilitako emakumeek menpekotasun adierazle diren jantziak erantzi, eta kirolari borrokalari, konprometitu eta ausart bilakatu dira. Txalo asko ahalduntze prozesua irudikatu duen dantzaldiari.
Euskal Herrian eta mundu osoan bezala, Lezon ere bat egin dute Martxoaren 8arekin. Zaintza ereduaren aldaketa jarri dute berriz ere borroka feministaren erdian eguneko irakurketa Saldisen egin dutenek, herriko mugimendu feministaren izenean egindakoa. Borroka hori dimentsio askotan egin behar dela adierazi dute, eta horri begira erakundeetan jarri dute fokua: “Kudeaketa negargarria egiten ari dira”. Zaintza sistema publikoa indartu behar dela adierazi dute, eta pribatizazioei aurre egin. Eta sistema horri mugimendu feministak erantzun sistemikoarekin erantzun behar diola nabarmendu dute, soldaten arrakala basatia aipatuz. “Sistema jasanezina da, eta hori iraultzeko egin behar dugu borroka. Emakumeen bizitzak dira jokoan daudenak”.
Adierazi dute mugimendu feministak aspaldi erabaki zuela sistemari aurre egitea, iraultzea, zain ez egotea. Azken urteetan egindako urratsak, egindako lanari egotzi dizkiote. “Hori guztia ez litzateke posible izango militantziarik eta antolakuntzarik gabe. Plano ezberdinetan antolatzea ezinbestekoa da. Merezi du mugimendu honen parte izatea. Mundua aldatzen ari da, eta gu mundua aldatzen ari gara. Gora borroka feminista! Gora Euskal Herria feminista!”.
- Bihar (hilak 9, larunbata):
- 10:00etan, ibilketa nordikoan (nordic walking) dabiltzan emakumeek nahiz oinezkoek bost kilometroko ibilbideari ekingo diote. Ibilbide bera egingo dute emakume korrikalariek, baina 10:30ean abiatuta. Plazan hasiko dute bidea.
- 11:30ean, Emaion Harri Tiraketa taldearen erakustaldia probalekuan.
- 14:00etan, Ibaiondon, bertso bazkaria. Alaia Martin eta Ekhiñe Zapiain izango dira bertsolariak, eta Amaia Resendek emango dizkie gaiak. Txartelak salgai dira Txingurrin eta Tiñelun.
- 19:30ean, Koldobike Gezala pilota txapelketaren finala, Koldobike Gezala pilotalekuan.
