Mahaiaren bueltan ere konplize
Auzoetako Emakume Taldeetako kideak mahaiaren bueltan ospatu dute Martxoaren 8a. 40 urte bete dituzte aurten auzoetan emakumeentzako konplizitate eta ahalduntze espazioak eraikitzen.
Auzoetako emakume taldeetako emakumeen bazkaria iazko Martxoaren 8an. Aldarrikapenerako eguna da gaur, baita ospakizunerako ere. Biak ala biak egingo dituzte auzoetako emakume taldeetan biltzen diren lagunak. Mahaiaren bueltan ospatu dute Emakumearen Nazioarteko Eguna gaur eguerdian 300 emakumek baino gehiagok, baina ospatzetik harago 40 urte luze hauetan ondoen egiten jardun dutena egin dute gaurkoan ere, haien arteko sareak josi eta konplizitate eta ahalduntze espazioak sortu.
Lau hamarkada bete dituzte auzoetako emakume elkarteek izendapen horrekin jarduera hasi zutenetik, eta gaur egun milatik gora dira elkarte horietan antolatzen dituzten jarduerekin bat egiten duten herriko emakumeak. Ez da nolanahikoa lana eta herrian zein emakumeen ahalduntzean izan duten eta oraindik orain duten eragina eta egiten duten ekarpena.
Merkatuzarren egin dute bazkaria, giro paregabean. Duela 40 urte elkarteak martxan jarri zituztenean emakumea kalera ateratzea izan zuten helburu, haien arteko harreman sareak sortzea antolatutako tailerren bidez. Helburua sobera bete dute, argi dago hori, baina kontziente dira, urratsak eginda ere, asko falta direla egiteko oraindik ere jendarte parekide bat lortzeko.
Ospakizunaren lekukoa, aldarrikapenak hartuko du orain. Bazkariaren bueltan bildutakoek bat egingo baitute ordubete eskas barru Herriko Plazatik Oreretako Mugimendu Femnistak deituta abiatuko den manifestazioarekin.
