Kirol taldeek laguntzak eskatzeko epea, zabalik
Eskola Kirolean parte hartzen duten haurren familiei begirako diru laguntza lerro bat ere badago aurten.
Kirol taldeek diru laguntzak eskatzeko epea zabaldu du udalak. Kirol entitateek 2023-2024 denboraldirako emango dituen diru laguntzak eskatzeko epea zabalik dela jakinarazi du udalak. Aurten, halaber, Eskola Kirolean ari diren haurren familientzako ere badela diru laguntza lerro bat jakinarazi du; laguntza hori, familiek ordaintzen duten kuotaren %100 izan daiteke. Laguntza hori bideratuta dago Diru Sarrerak Bermatzeko Errenta, Gizarte Larrialdietarako Laguntza edo antzeko programetan sartuta dauden familientzat.
Laguntzak eskatzeko epea, hilaren 25ean bukatuko da, jarduera berezietarako laguntzak izan ezik, hori abuztuaren 31n bukatuko da. Informazio guztia eta eskabideak, hemen klik eginda lor daitezke.
319.000 euro laguntzetan iaz
Errenteriako Udalak 319.000 euro bideratu zituen guztira iaz klub, kirol entitate eta kirolarien artean kirola sustatzeko ekintzetarako diru laguntzak ematera. Denera, 21 klubek eta kirolarik egindako eskaerak onartu zituen, eta, horretaz gain, diru laguntza nominatiboa emateko lau hitzarmen sinatu zituen udalak Errenteria-Oreretako bost klubekin.
Emakumeek kirola egitea sustatzea, kirol egokituaren bidez, aniztasun funtzionala duten pertsonak integratzea, eta udalerrian kirol jarduerak garatzea bultzatzea du helburu udalak, oro har kirola praktikatzea sustatzea du helburu, modalitate ezberdinetako klubak, ikastetxeak, elkarteak edo kirolariak laguntzea.
Lehenengo diru laguntza lerroa kluben ohiko jardueretara zegoen bideratua eta guztira 37.100 euro inbertitu zituen udalak aurkeztu ziren sei programak diru laguntzeko. Bigarren lerroa, ez ohiko jarduerak, kirol minoritarioak eta kirolariak laguntzera bideratu zuen udalak: 27.000 euroko diru zatia bideratu zuen udalak aurkeztutako hamabost programei diruz laguntzeko.
Eskola Kirola sustatzeko, berriz, 115.993,98 euro bideratu zituen udalak Errenteria-Oreretako ikastetxeetara. eskola kirolaren egiturak sortu eta kudeatzeko, eta begiraleak kontratatzeko. Horretaz gain, eskola igeriketa kanpaina era finantzatu zuen aurreko urteetan bezala. Hartzaileak, 1. eta 2. mailako ikasleak. 18:000 euroko inbertsioa egin zuen udalak kanpaina hori martxan jartzeko, eta 346 ikaslek hartu zuten parte.
Diru laguntza nominatiboak lau talderekin
Aurreko laguntzez gain, pasa den urtean lau diru laguntza nominatiborako hitzarmenak sinatu zituen udalak beste hainbat elkarterekin: Touring KE, EPLE, Mindara eta Hibaika Arraun Elkartea. Mindara elkartearekin sinatu zuten hitzarmena, 20.000 euroko diru laguntzarekin, kirol egokitua eta aniztasun funtzionala duten pertsonen parte hartzea sustatzen duen elkartearen jarduerak bultzatzeko izan zela nabarmendu du udalak.
Horrekin batera, Errenteriako Udalak denboraldi osoan zehar mantendu zuen aldaketarik gabe udal kirol instalazioen doako erabilera ekipo federatu zein ikastetxeentzat, bai entrenamendu zein partida ofizialak jokatzeko, baita lagun arteko lehiaketetarako ere. Halaber, doan utzi zizkion udalak Galtzarabordako kirol instalazioak Beti Bizkor erretiratuen elkarteari, gimnasia aktiboko programak garatu ahal izateko denboraldi osoan.
