Emakume kirolariena izan da asteburua
Martxoaren 8ko egitarauaren barruan, emakume kirolariena izan zen larunbata. Harri tiraka, pilotan, lasterka eta ipar martxan aritu ziren.
Emaion harrri tiraketa taldekoak, larunbateko erakustaldian. Emakumeak kirolaren bidez ahaldundu eta elkartzeko hainbat baliabide dituzte Lezon. Herriko eragileen eta Lezoko Udalaren programei esker, herriko andreek kirolean espazioa irabazteko aukera asko dituzte. Horren erakusle izan zen larunbatean egin zituzten jarduerak.
Goizean, Emakume Korrikalari Taldekoek eta ipar ibilketa egiten dutenek herriko kaleetara atera zuten euren jarduna. Gainera, Emaion harri tiraketa taldekoak herriaren aurrean azaldu ziren lehenengoz, erakustaldi ikusgarriarekin. Arratsaldean, berriz, Koldobike Gezala Banakako I. Pilota Txapelketaren finalak jokatu ziren. Goizeko eta arratsaldeko kirol jardueren artean, gogoz eta gorputzez indarberritzeko bertso bazkaria izan zen Ibai Ondon.
Larunbatean egindakoekin bukatu ziren Martxoaren 8aren barruko ekitaldiak, herriko eragileek elkarlanean eta udalaren babesarekin antolatutakoak. Horietatik nabarmenetakoa lehenengoz egin den Koldobike Gezala Banakako Pilota Txapelketa izan zen. 11 izan dira lehian parte hartu duten emakumeak, eta horietatik bizkorrena Lobete, hark irabazi zuelako larunbateko finala Pikabearen kontrako final estuan (22-20). Hirugarren posturako partida Lozanok irabazi zuen, Dorronsororen kontra (22-15).
Jarraian, larunbateko hainbat irudi eta Emaion taldekoen erakustaldiaren bideoa.
