Larunbatean, XV. San Pedroko Test Estropada
37 traineru bilduko dira neguko azken prestaketa estropadan. Eguraldiaren araberako bi eremu prestatu ditu Sanpedrotarra Arraun Elkarteak.
San Pedroko 'Libia' trainerua, otsailaren 10eko Oriako jaitsieran. Argazkia: Josu Z. Traineruen neguko azken prestaketa estropada antolatu du larunbaterako Sanpedrotarra Arraun Elkarteak, San Pedroko XV. Test Estropada. Osotara 37 traineru izango dira badian udara begirako azkenetakoa izan daitekeen entrenamendu saio kolektiboan. Horietatik bederatzi Oarsoaldekoak eta Bidasokoak: San Juan, Hondarribia eta Hibaika emakumeetan, eta San Juan B, Hibaika, Hondarribia B, San Juan, San Pedro eta Hondarribia gizonetan. 16:00etan hasiko dira ateratzen ontziak, banaka, erlojupekoa delako lehia.
Hasiera batean planteatutako estropada eremua da honakoa.
Sanpedrotarra Arraun Elkarteak bi eremu prestatu ditu, eguraldiaren arabera bat edo bestea aukeratzeko. Eguraldia egokia bada, irteera puntua San Pedroko Torrean izango dute partaideek, eta kanpoko ziaboga bokalearen sarrera itsasorantz pasata. Emakumeek bi luze eta ziaboga bateko bidea egingo dute, eta gizonek lau luze eta ziaboga bakarrekoa (gizonen barneko ziaboga irteera puntukoa izango da; helmuga ere bertan izango da jarrita, emakume zein gizonentzat). Eguraldia txarra balitz, kanpoko ziaboga San Pedroko punten inguruan jarriko litzateke, eta barrukoa kaiko Antxoko nasaren parean.
Partaideak hiru multzotan banatu dituzte. Lehenean 17 traineru daude, eta horiek banaka-banaka aterako dira, minutuko tartearekin. Euren egitekoa denek bukatzen dutenean, bost minutuko tartearen ondoren hasiko dira ateratzen bigarren txandakoak (10 traineru); azken hauek bidea bukatzean, berriz ere bost minutuko tartea, eta hirugarren multzokoak lanean hasiko dira (10 traineru). Lehen multzoan ETE, EuskoTren, KAE2 eta Galiziako Ligako (bat) traineruak izango dira; bigarrenean KAE1 Ligakoak; eta hirugarrenean Eusko Label Ligakoak.
Honakoa, itsaso txarrarekin erabiliko den estropada eremua.
Honakoak dira hiru multzoetako partaideak:
- 1. multzoa (16:00etan hasiko dira bogan): San Juan (ETE Liga), Hernani (ETE Liga), Zarautz (ETE Liga), Zumaia (ETE Liga), Kaiku (ETE Liga), Cabo (EuskoTren Liga), Hibaika (EuskoTren Liga), Hondarribia (EuskoTren Liga), Donostiarra (EuskoTren Liga), Orio (EuskoTren Liga), Arraun Lagunak (EuskoTren Liga), Tolosaldea (EuskoTren Liga); San Juan B (KAE2 Liga); Cesantes (Galiziako Liga), Hibaika (KAE2 Liga), Donostiarra B (KAE2 Liga) eta Busturialdea (KAE2 Liga).
- 2. multzoa (denak KAE1 Ligako traineruak dira, 16:50an hasiko dira ateratzen): Orio B, Hondarribia B, Pedreña, Camargo, Zarautz, Zumaia, San Juan, Arkote, Lapurdi eta Santurtzi.
- 3. multzoa (denak Eusko Label Ligakoak dira, 17:30ean hasiko dira ateratzen): Ondarroa, Kaiku, Isuntza, Getaria, Orio, San Pedro, Donostiarra, Hondarribia, Zierbena eta Bermeo.
