Airearen kalitatea neurtzeko estazioa eskatu du Eguzkik
Eskaera hori iazko azaroan egin zuen eta joan den urteko abenduan eztabaidatu udaleko Ingurumen Aholku Batzordean. Ondorio juridikoak aztertu arte atzeratu zuten erabakia hartzea.
Errenteria izango da tentsio eremu izendapen ofiziala jasoko duen Hego Euskal Herriko lehen udalerria. Egukzi talde ekologistak aire kalitatea neurtuko duen estazioa nahi du Errenteria-Oreretan. Horren gaineko eskaera zehatza egin zuen, Eusko Jaurlaritzari halako sistema ezartzea eskatzeko proposatuz joan den urteko azaroan. Proposamen hori, Errenteriako Udalaren Ingurumen Aholku Batzordera eraman zuen eztabaidarako, joan den abenduan, “ingurumenean eta pertsonen osasunean eragiten dituen ondorio negatiboengatik gero eta garrantzia handiagoa hartzen ari den gaia dela iritzita”.
Jakinarazi duenez, ez zen aholku batzordean erabakirik hartu proposamenaren inguruan: “kontseiluko lehendakariaren ustez eskaera egiteak izan ditzakeen ondorio juridikoak ezagutu behar direlako aurretik, eta gaia beste bilera baterako utzi zen”. Jarrerak “harritu” bazuen ere, Eguzkik ez zuela eragozpenik jarri proposamena atzeratzeko jakinarazi du.
Talde ekologistaren iritzirako, proposamenak izan ditzakeen ondorio juridikoak argitzeko denbora nahikoa izan da, “hortaz, espero dugu proposamena ingurumen kontseiluaren hurrengo bileran eztabaidatzea, eta kide guztien adostasuna jasotzea”. Airearen kalitatea neurtzeko estazioa “funtsezko” tresna dela airearen egoera ezagutzeko gaineratu du Eguzkik, “baita airearen kalitatea eta pertsonen osasuna hobetzeko beharrezkoak eta eraginkorrak diren neurriak ezartzeko”.
2020an, 24.000 heriotza goiztiar
Airearen kutsaduraren ondorio “larriak” izan ditu hizpide talde ekologistak eta hainbat datu eman ditu. Hala Ingurumenaren Europako Agentziara jo du, haren esanetan, 2020an, 24.000 heriotza goiztiar izan ziren Espainiako Estatuan, atmosferaren kutsadurarekin lotuta. Australiako Monasheko Unibertistatearen The lancet planetary healt aldizkariari ere egin dio aipamena Eguzkik. Aldizkari zientifikoak argitaratutako txostenak milioi bat heriotza baino gehiago zenbatu ditu PM2,5 partikulen eraginpean egoteagatik epe laburrean, egunetan, edo soilik orduetan; horietatik %12 Europan izango lirateke.
Azken erreferentzia Irungo Udalari egin dio talde ekologistak, “iazko uztailean onartu zuen airearen kalitatea kontrolatzeko eta haren jarraipena egiteko monitorizazio sare bat lau urtez hornitzeko, ezartzeko, martxan jartzeko, operatzeko eta mantentzeko kontratazioa. Horretara, 179.830,20 euro bideratuko ditu eta Next Generation funtsek finantzatuko dute”.
