Korrika jaiaren eskutik helduko diote lekukoari
Egun osoko egitaraua ondu dute 23 Korrikari harrera egiteko. Herri bazkarirako txartelak salgai dira.
22 Korrika Errenteria-Oreretan. 23 Korrika hilaren 23an helduko da gauerdirako minutu gutxi falta direla. Korrikari berari merezitako harrera egin eta herria girotzeko egun osoko egitaraua ondu du Korrika Batzordeak egun horretarako.
Zumardia izango da agertoki nagusia Korrika Errenteria-Oreretara Lezotik heldu aurretik. Karpa jarriko dute bertan, eta 13:30ean zabalduko dute hura eta barra. 14:30ean, berriz, bazkaria egingo dute. Euskal parrila izango da eskaintza, baina aukeran izango dute bertaratzen direnek bazkari beganoa, bai eta haurren menua ere. Txartelak salgai dira 20 euroan orokorrak, eta 14 euroan haurrei begirakoak, Xenpelar AEK Euskaltegian, eta Sindikato eta Arkaitza tabernetan.
Bazkalosteko giro baliatuko dute Euskararen paparazziak Oarsoarrakek antolatutako argazki lehiaketako sari banaketa egiteko; 16:15ean izango da hori, eta ondoren bingo musikatuak hartuko du lekukoa.
Txalainak Errekaldeko hirukoteak, Hertzainak taldearen kantak akustikoan moldatzen dituenak, emanaldia eskainiko du19:00etan hasita. Ordu berean, nahiago dutenek Bantzan ikuskizuna gozatzeko aukera izango dute Lekuona Fabrikan. EMKE Musika Bandak eta Ereintza Dantza Taldeak eskutik ondu duten musika eta dantza ikuskizun berritzaile eta ederra. Azken horretarako sarrerak, 7 euroan eros daitezke. Egin klik hemen.
Hilaren 23ko azken minutuetan helduko da 23 Korrika Errenteria-Oreretara, 23:51ean zehazki. Lezotik helduko da, eta 23:55 Mikel Martin Conde ekintzailea zenaren omenezko kilometroa egingo dute. Behin korrika pasata, 00:45 DJ Expuelak hartuko du lekukoa, Xenpelar AEKn (Biteria kalea, 30).
