Alkatearekin edo udal gobernuko kideekin aurrez aurre egoteko aukera Lezon
Gobernu taldeko kideei zuzenean euren kezkak eta ekarpenak helarazteko aukera izango dute lezoarrek aurrerantzean.
Lezoarrek alkatearekin edo udal gobernuko kideekin aurrez aurre egoteko aukera izango dute aurrerantzean. Aurretik hitzordua eskatuta, euren ekarpenak, kezkak, nahiak eta ezinegonak zuzenean udalaren gidariei helarazteko aukera izango dute hala nahi dutenek.
Zehazki, bi ordutegi prestatu ditu udal gobernuak herritarrekin egon ahal izateko: asteazkenetan 16:00etatik 19:00etara, eta ostiraletan 09:00etatik 12:00etara. Hala, bi egun horietarako txanda hartzea beharrezkoa da, eta hori egiteko bi bide erraztu ditu udalak. Bietan ala bietan norekin hitz egin nahi duten zehaztu behar dute lezoarrek, baita zein gairi buruz ere.
- Telefono dei bidez: 943 52 98 86ra hots egiten.
- Posta elektronikoz: klik egin hemen helbidera iristeko.
Behin hitzordu eskaera eginda, udalak eskatzaileekin harremana egingo du data konfirmatzeko.
“Lehenengo egunetik adierazi bezala, EH Bilduko udal gobernuaren bokazioa da udaletxeko ateak irekitzeaz harago, udal gobernu taldea izatea herritarrengana hurbilduko dena. Honako hau bide horretan lehen urratsa da. Aurrerago etorriko dira gehiago. Guztiontzat onuragarria izango delakoan, segi dezagun Lezo elkarrekin hobetzen”, azaldu dute gobernukideek.
