'Phoenix', Pasaiako Itsas Festibalean
34 metroko eta bi mastako ontzia da 'Phoenix'. Festibalean izango den ontzirik handiena izango da Danimarkan eraikitakoa.
'Phoenix' ontzia, itsasoan. Pixkanaka ari dira 2024ko Pasaiako Itsas Festibalaren gaineko xehetasunak iristen. Ontziek protagonismo handia dute jaialdian, eta Pasaian maiatzaren 9tik 12ra izango den ontzi handienaren baten berri eman dute: Phoenix bergantina. Izango diren ontzi guztien artean nabarmenetakoa izango da, eta barrualdea bisitatu ahalko da.
34 metro luzekoa da 1929an Frederikshavnen (Danimarka) eraikitako ontzia. Itsas Festibaleko kideek adierazi dutenez, jatorriz misio ebanjelikoko goleta gisa erabili zen, eta hogei urtez eginkizun horretan aritu ondoren, karga-ontzi bihurtu zen, makina-gela kaltetu zuen sute baten ondorioz jarduera eten zen arte. 1974an beste jabe batzuek erosi zuten eta bergantin bilakatu zuten, eta 1988an Square Sailek erosi zuen.
Hainbat misiotan izandako ibilbide luzeaz gain, itsasontziak badu bere historian pasadizo nabarmen bat, film batean agertu baitzen. Hain zuzen ere, 1991ean XV. mendeko karabela bihurtu zuten, zehazki Santa Maria karabela, Ridley Scotten 1492: Paradisuaren konkista filmean parte hartzeko. Izan ere, itsasontzia Santa Maria ezizenarekin ezagutu izan zen, 1996an bi mastako bergantin bihurtu eta jatorrizko izena berreskuratu zuen arte: Phoenix of Dell Quay.
