Sortzaileen Korrika ondu du Udal Bibliotekak
Euskal herriko biblioteka guztiekin harremanetan jarrita eta herriz herri proposamenak bidaltzeko eskatu die, Korrikaren mapa baliatuta sortzaileen korrika birtuala osatzeko.
Korrikarekin bat egin eta atzotik Sortzaileen Korrika martxan du Errenteria-Oreretako Udal Bibliotekak. Sortzaileen Korrika hori mapa birtual bat da. Korrikaren mapa baliatuta, Euskal Herri osoko bibliotekekin harremanetan jarri da udalerrikoa, eta herriz herrika proposamenak bidaltzeko eskatu die. Korrikaren ibilbideak zeharkatzen duen herri bakoitzeko sortzaile baten lana jasotzen du mapa birtualak.
Idazleak, ilustratzaileak, musikariak, ikerlariak… askotariko arloetako sortzaileen obrak bildu ditu Udal Bibliotekak Sortzaileen Korrikara, baita herriaren gaineko obrak ere, edo bertan gertatzen diren istorioak.
Bibliotekak ondu duen mapa interaktibo hori, herritar denen eskura jarri du orain Kultura sailaren web orrian. Hemen klik eginda ikus daiteke. Mapako herri bakoitzean klikatuz gero, bertako informazioa ezagutu ahal izango du erabiltzaileak Euskadiko Liburutegiko Sareko katalogoan. Gainera, jasotako informazio guztia udal bibliotekekin partekatu dute guztien artean egindako lana denek erabilgarri izan dezaten.
Maparen bertsio fisikoa ere egin dute Lekuona Fabrikaren 0 solairuan. Horren ondoan eguneko Korrikaren ibilbideko herrietako sortzaile eta obrak eskuragarri izango dira maileguan eramateko aukerarekin.
Iniziatibaren osagarri, eta Lekuona FAbrikan bertan, Korrika zuzenean ikusteko aukera izanngo dute herritarrek horma batean proiektatuta. bestalde, hilaren 22an, ostirala, Orereta Ikastolako DBHko ikasleek Korrikaren alde Podcast formatua izango duen ekintza berezia antolatu dute. Zuzenean grabatuko dute Lekuona Fabrikan, eta bertan iniziatibaren berri emango dute. Ondoren, entzungai jarriko dute podcasta.
Korrikaren barruan bere kilometroa izango duela erantsi du udalak; Arramendi pasealekuaren 15. zenbakitik abiatuta hasiko du.
