Harro Habana! (edo John Lennonek Korrikaren petoa jantzi zuenekoa)
Larunbatean Habanan ere Korrikaren lekukoa eskuz esku ibili zen. Horren atzean Borja Arbelaitz oreretarraren pasioa dago.
Arbelaitz, lekukoa eskuan, Habanan. Kubako hiribururaino iritsi da 23. Korrika. Horren eragile, Borja Arbelaitz oreretarra. AEKn 21 urtez aurrez aurreko irakasle lanetan aritu ondoren (egun online eskolak ere ematen ditu), Etxepare Euskal Institutuak eta Habanako Unibertsitateak 2015ean hitzartutako lankidetza hitzarmenari esker Habanako Unibertsitateko Euskara eta Euskal Kultura Irakurletza egitasmoa da abian, eta horren arduradun da Arbelaitz; Joseba Sarrionandiaren lekukoa hartu zuen oreretarrak 2022ko irailean. Bada egunotan 23. Korrikaren ordezkari da Kuban. Gozamena harentzat, eta kubatarrentzat. “Harro herri, harro Habana!” oihukatu zuten larunbatean han. Korrikaren lekukoa lehenengoz 22. Korrikan eraman zuen Borjak (2022ko edizioan), OiangozHau eragilearen izenean, haren arreba Idoiarekin batera. Bigarrena non, eta Habanan hartu du.
Izan ere, Habanako Korrika egin zuten. John Lennon parkearen eta La Casa de la Bombilla Verde taberna-jatetxearen arteko (euskaldunontzat erreferentziazko gunea da hura) bidea egin zuten lekukoa eraman zutenek. Hasieran, nola bestela, The Beatles taldearen sortzaileetakoaren eskulturan talde argazkia egin zuten, musikariari Korrikaren petoa jarrita. Haren abesti ezagunenetakoa Imagine da. Irudika daiteke Euskal Herri erabat euskaldun bat? Bada bide horretan lagungarri izan daiteke Korrika, eta AEKren jarduna. Hemen eta Habanan.
Lekukoa Arbelaitzen unibertsitateko ikasle, ikasle ohi, eta Kubako euskaltzaleek eraman zuten eskutik eskura. Harro eraman zuten, oso harro. Behin La Casa de la Bombilla Verdera iritsita, manifestua irakurri, eta festa egin zuten.
Eguberrietan bidali zioten euskararen aldeko martxaren materiala Kubara AEK-ko kideek Arbelaitzi. Ordutik desiratzen izan da hori guztia Habanako karriketara ateratzeko. Irribarre batekin, alai eta pozik egin zuten bidea. Emozionatu egin ziren.
Habanako Korrika iragartzeko kartelean, Korrikaren aurreko edizio bateko irudia ageri da, euskaltzaleak elur artean lasterka ari direla. Horrek badu pasadizoa atzean. Borja Arbelaitz 2022ko Eguberrietan Euskal Herrira bisitan itzuli zenean, kontatu zuen ikasle kubatarrek eskatu ziotela elurra agertzen zen argazkiak bidaltzeko haiei. “Badakite zer den elurra. Baina ukitu, usaindu, inoiz ez!”. Bada argazkiak baino, kartela eskaini zien kubatarrei oreretarrak, zer eta 23. Korrika iragartzeko! Harro Borja!
Ondokoak Habanako Korrikaren irudiak dira, larunbatekoak, Idoia Arbelaitz AEK-ko irakasle eta Borjaren arrebak HITZAra bidalitakoak.
