Lezoko elkartasunak Sahararaino eraman du 23. Korrika
Lezoar talde bat Saharan da elkartasun lanean, erizainak dira. Bertan bizi direnei laguntza emateaz gainera, ez dute aukerarik galdu 23. Korrika haraino eramateko.
![](https://oarsoaldea.hitza.eus/site/files/2024/03/lezo-sahara-elkartasuna-korrika.jpeg)
Mundu osoan da 23. Korrika. Saharara lezoarrek eraman dute. Han dira hilaren 11tik elkartasun boluntariotza lana egiten, zehazki mendebaldeko Saharako Auserd herrian, lau lezoar eta Ondarroako kide bat. Mundubat gobernuz kanpoko erakundearen bitartez dira han, eta erizainak dira bostak. Sahararrei behar-beharrezkoa duten osasun arta ematen ari zaizkie, baina lan gogorraren erdian, 23. Korrikari keinua egiteko aukera ez dute galdu: Saharako Korrika egin dute. Lekukoa Lezon eman diete, eta Saharan jaso dute. Harro.
Itsaso Arruti Otaegi, Edurne Lizarazu Casamayor, Ainhoa Olaizola Berroa, June Ugalde Pikabea eta Lorea Etxaburu Aizpurua dira han diren erizainak, lau lehenak lezoarrak eta bosgarrena ondarruarra. Hilaren 24an dira bueltatzekoak Euskal Herrira erizainak, beraz, 23. Korrika zuzen-zuzenean Lezotik pasatzen ezingo dute ikusi. Petoak eta banderak eramanak zituzten Sahara aldera, ordea. Eta hango hainbat biztanleren konplizitatearekin egin diote keinua Korrikari, beraz, euskarari: petoekin, banderekin, “Korrika!” oihuekin, eta sahararrek egindako marrazkiekin. Denetik dute faltan han, egoera oso tamalgarrian bizi dira, bizi baldintza oso eskasak dituzte. Edozein laguntza dute beharrezko. Horretarako daude han bost erizainak, ahal dutenean laguntzen. Ordainetan, irribarre bat eta esker ona sahararren partetik. Lezoarrek ez dute besterik behar.
Harro herri da 23. Korrikaren leloa. Lezok, eta Euskal Herriak, badituzte arrazoiak Korrikaz eta euskararen aldeko jarreraz aparte harro egoteko. Saharako herria era boluntarioan laguntzera doazenez ari gara. Harro zuetaz herria, eta Euskal Herria. Eta euskararen balioa planetaren zati hartan zabaltzeko aukerarik bada, hobe!
Jarraian dagoen bideoa Saharan diren lezoarrek egindakoa da, 23. Korrika Saharan ere izan denaren lekuko.