Nerea Azkona eta Marta Burgos, Jose Luis Ansorena Bekaren irabazleak
Andra Mari abesbatzak eta Musikenek antolatzen dute beka, Errenteriako Udalaren laguntzarekin. Aurtengoa, laugarrena izan da.
Nerea Azkona Galarraga eta Marta Burgos Rueda. Nerea Azkona Galarraga eta Marta Burgos Rueda izan dira aurtengo Jose Luis Ansorena Bekaren irabazleak. Andra Mari abesbatzak eta Musikenek, Euskal Herriko Goi Mailako Musika Ikastegiak antolatzen dute beka, Errenteriako Udalak lagunduta. Musikari gazteak, eta bereziki, goi mailako ikastaroetan ari direnak laguntzea du xede beka horrek batetik; bestetik, euskal kulturaren ondarea ezagutaraztea edo ondarea hornitzen jarraitzea berriak izan daitezkeen musika lanen bitartez.
Deialdia, Musikeneko Master Mailan ari diren ikasleentzat egiten da eta lehiaketan, bakoitzaren saioan, derrigor interpretatu behar ziaten dute euskal musikaren obra bat.
Hilaren 9an Musikenek aukeratutako ikasle onentsuenak aritu ziren lehian, antolatzaileek jakitera eman dutenez; Andra Mari abesbatzaren egoitzan izan zen lehiaketa. Zazpi lagunek hartu zuten parte eta azkenean, Azkona eta Burgos garaitu ziren, eta beraz, saria partekatu egin beharko dute. 2.000 euroko beka eta Errenteria-Oreretan kontzertu bat emateko konpromisoa dira saria. Kontzerturako data zehaztu dute: apirilaren 20an izango da.
Donostiarra da Azkona, harpa jotzailea; Burgos berriz, Alhaurin el Grandekoa (Malaga, Andaluzia, Espainia), eta klarinete jotzailea.
