23. Korrika, Lezoko lekukoak: nork eta non hartuko ditu?
23:36an termikan. Orduan iritsiko da gaur 23. Korrika Lezora. Lekukoa eramango dutenak herri oso baten ordezkari izango dira.
Iritsi da eguna. 23. Korrikaren eguna. Aurretik Lezoko Korrika Batzordeak antolatutakoak pasatu dira. Gaur da pasatu behar den garrantzitsuenaren txanda, Korrikarena. 23:36an jasoko du Lezok martxa erraldoia, ziurrenik neke zantzuekin, hilaren 14an hasi zelako Irunen eta dagoeneko 2.600 kilometro inguru eginak izango dituelako herrira iristerako. Baina herriak, lezoarrek, beste bultzada bat emango diote eskualdetik harro eta fin joan dadin, eta biharko Baionako azken eguna biribila izan dadin.
Korrikaren protagonistetakoak lekukoen eramaileak dira. Euren taldeen, eragileen, elkarteen ordezkari dira. Baita herri oso baten desioarena ere: euskaraz bizi ahal izatearena. Albiste honi erantsitako argazkian Lezon lekukoa nork hartuko duen adierazita dago, Oroitzene AEK-k kideek egindako grafikoaren bitartez.
Grafiko hori 23:36etik izanen da indarrean. Ordura arte herria Korrikaz jantziko da. Horretarako egitaraua antolatu du Korrika Batzordeak, beheko koadro urdinxkan dagoena.
Herriko euskaltegikoek mezua helarazi diete lezoarrei: “Iritsi da Korrika eguna! Gaur bertan pasako da Korrika Lezotik. Gozatu eguna, gozatu euskaraz eta gozatu zareten HARRO HERRI honetaz. Mundialak zarete, lezoarrak.
Gora Korrika, gora AEK eta gora Lezo!”. Hala bedi.
Lezoko Oroitzene AEK-ko kideak.
- 14:00etan, herri bazkaria Karlos Saldise plazan.
- 16:00etan, bingo musikatua Karlos Saldisen.
- 17:00etan, Goiko plazan, kuadrillen arteko sokatira txapelketa (16 urtetik gorakoentzat). Bitarte horretan haurrentzako herri jolasak izango dira.
- 18:00. Elektrotxarangaren irteera herritik.
- 20:00etan, afari merienda Saldisen.
- 20:30ean, berriz ere elektrotxarangaren irteera.
- 21:30ean, Txirbilla Sound System.
- 23:36an, 23. Korrika Lezora iritsiko da, termikara.
- 00:00-02:00, DJ Kalimoustro Lezon.
