Pasaian, beroketa ariketa betean
23. Korrikari behar bezalako harrera egiteko girotze ekitaldi asko egingo dituzte gaur Pasaian. Goiztiarrenak antxotarrak izan dira.
Gaur da eguna. Eta tamainako erantzuna ematen hasi dira pasaitarrak. Udalerrira 22:50an iritsiko da 23. Korrika, Antxora. Handik atera eta Trintxerpe (23:13), San Pedro (23:17) eta Donibane (23:28) zeharkatuko ditu AEKren martxa erraldoiak. Ia agortzear iritsiko da Pasaiara Korrika, baina lau barrutiak pasata indarberrituta aterako da.
Herriko lau barrutietan egitarauak antolatu dituzte Korrikari behar bezalako harrera egiteko. Goiztiarrenak antxotarrak izan dira, eguerdian lipduba eta geroago Ibaiondo pilotalekuan herri bazkaria (bertakoak dira beheko irudiak) egin dituztelako. Bai Antxon zein bestelako barrutietan arratsaldean bada zer egin. Behealdeko koadro urdinskan ikus daitezke barrutietako egitarauak.
Jarraian daudenak, Antxoko Txirrita AEK-ko kideek HITZAra bidalitako argazkiak dira. Bestalde, bihar (igandea) goizean zehar HITZAk barruti guztietan lekukoak eraman dituztenen argazkiak jarriko ditu webgune honetan.
23. Korrika. Gaurko (larunbata) Pasaiako egitarauak.
Antxo:
- 14:30. Bazkari herrikoia egingo dute Ibaiondo pilotalekuan. Ondoren, bingo musikatua egingo dute, eta jarraian mini-olinpiadak izango dira. Bukatzeko, Joselontxo’s txarangak dantzan jarriko ditu Antxoko kale eta plazak.
- 21:00. Antxoko elkarteek kozinatutako pintxoak dastatzeko aukera izango da Biterin.
- 22:30. Buenavistako biribilgunean biltzera deitu dute, 23. Korrikari harrera egiteko.
- 22:50. Korrika iritsiko da.
Trintxerpe:
- 17:00. Boli kalean kale antzerkia, 3-6 urte bitartekoentzat Gernika plazan.
- 19:15-21:15. Txaranga barrutiko kaleetan barrena.
- 21:15. Afari autogestionatua eta bingo musikatua Gernika plazan.
- 22:30. Herritarren argazkia eta musika.
- 23:13. Korrika iritsiko da.
San Pedro:
- 17:00. Konkista dezagun euskara abentura jokoak, pilotalekuan.
- 20:00-22:00. Kitadelpare txarangaren emanaldia eta bokata-jana herriko tabernetan (aurretik izena eman beharko da).
- 23:17. Korrika iritsiko da.
Donibane:
- 18:00. Gazteentzako tailerrak egingo dituzte Kultur Aterpean.
- 19:00. Bertso poteoa egingo dute barrutiko tabernetan, Hamarru elektrotxarangarekin.
- 21:00. Afari autogestionatua Santiago plazan. Ondoren, Maddi Ane Txoperena eta Josu Ibarguren bertsolariek gidatutako Korrikaren aldeko topa. Jarraian, kantaldia Joxe Leon Kazabonekin, Irati Odriozolarekin eta Ane Badiolarekin.
- 23:28. Korrika iritsiko da.
