Zoru berria du Agustina Otaola pilotalekuak
Pasa den astean bukatu zituzten lanak. Udalak49.000 euroko inbertsioa egin du pilotalekuaren zorua birgaitzeko.
Pilotalekuaren zorua berritu du udalak, besteak beste. argazkia: Herri Bizia Zoru berria du Agustina Otaola Raketista Profesionala pilotalekuak, lanak joan den astean bukatuta. Udalak bertan egin dituen lanek, kantxan zeuden hezetasun eta kondentsazio arazoak konpontzea zuten helburu bereziki, izan ere, arazo horiek kirolerako ohiko erabilera eragozten zuten.
Astelehenetik bueltan dira berriro EPLE Errenteriako Pilotaren lagunak Elkarteko pilotariak, entrenamenduak hasita, baita Pilota Eskola ere, eta asteburuan pilota partida ofizialak jokatzea aurreikusia dagoela jakinarazi du udalak.
Lanak egiteko, 49.000 euroko inbertsioa egin du udalak. Asfalto urtuzko zoladura kendu, hormigoizko oinarria mekanikoki leundu eta pilota modalitate guztiak jokatu ahal izateko azalera bihurtu dute.Horrekin batera, egungo harmailetan dauden kaxak aldatu dituzte, azaleraren neurri berrietara egokituz, instalazioko harmaila teleskopikoa erabiltzea erraztuko duena.
Frontisean ere egin dituzte hobekuntzak. Lauza euskarrietan zenbait arazo zituen azken horrek, eta harlauzak xehatu, horma osoko euskarriak saneatu, eta kareharrizko harlauza berriak jarri; frontisa margotu dute. Azken lan horietara, 8.000 euro bideratu ditu udalak.
Eskerrak eman dizkie kaltetutako eragileei Errenteriako Udalak, lanak iraun bitartean erakutsi duten pazientzia eta ulermenarengatik.
