Erresidentzietako erabiltzaileek jasotzen duten tratu "kaxkarra" agerian jarri dute
Pribatizazio ereduaren ondorioz ez dagoela pertsonal nahikorik, eta horien lan baldintzak "prekarioak" direla salatu dute.
Erresidentzien egoera salatu dute. Erresidentzietako erabiltzaileen senideak Duintasuna pentsiodunen elkartearekin harremanetan jarri ziren, kezkatuta. Izan ere, egoera latza dela jarri dute agerian eta ez dutela erabiltzaileek arreta egokia jasotzen. Batzarrera deitu zuten horren aurrean arazoa mahai gaineratu eta konpontzeko bidean jartzeko. Atzo egin zuten batzar ireki hori, eta bertan izan ziren auzo elkarteak, Duintasuna, mugimendu feminista, Sanmarkosene zein Jesusen Bihotza erresidentzietako langileak, enpresa batzordeak, eta erretiratuen elkarteak.
Egoeraren larritasuna baieztatu zuten atzoko batzarrean elkartutako eragileek, erresidentziek erabiltzaileei eskaintzen dieten arreta “kaxkarra” da haien iritzirako eta hori gainera, lan baldintza “prekarioak” dituen plantilla “urria” duen “pribatizazio eredu baten” ondorio den zalantzarik ez dute.
Hori horrela, ezinbestekotzat jo dute langile plantilla ugaritzea, “arazoa konpontzeko gako da hori; langileen baldintzak zenbat eta hobeagoak izan, orduan eta hobeagoa izango da erabiltzaileei eskaintzen dieten arreta eta zaintza”.
Bi egoitzetako langileek lan baldintzak salatu zituzten atzoko batzarrean, “egunero egunero baldintza kaxkarretan egin behar diogu arre lanaldiari”. Langile plantilla “eskasari” falta direnen ordezkorik ez jartzeak egoera okertzen duela esan zuten Sanmarkoseneko langileek. Egoeraren larritasuna erakusteko beste hainbat adibide ere jarri zituzten erresidentzia horretako langileek atzokoan: “Kartoizko plateretan egiten dituzte otorduak erabiltzaileek, eta gaueko txandan oso berandu oheratzen dituzte, langile faltaren ondorioz. Garbitegia zerbitzua eta garbiketa ere arrazoi berarengatik, langile faltarengatik, kaltetuta daude egunero”.
Langileek %100 eta hori baino gehiago emanda ere ezin dutela erantzun jarri zuten nabarmen, “ezin dugu gehiago”.
Bi zaharren egoitzek bizi duten egoera “larriaren” aurrean mobilizazioaren bideari ekitea erabaki zuten atzoko batzarrean eragileek. Datorren hastean hasiko dituzte protestak egoera konpon dezatela exijitzeko eta hilaren 15etik 21era beraz mobilizazioak iragarri dituzte. Errenteriako Udalean gainaren gaineko mozioa aurkeztuko dutela ere jakinarazi dute, udalbatzari adierazpen publikoa egin dezala eskatzeko. Mobilizazioen gaineko xehetasun guztiak datorren astean emango dituzte.
