Lezoko udalekuetan izena emateko epea astelehenean zabalduko dute
Hilaren 26ra arte eman daiteke udalekuetan izena. Uztailaren 1etik 30era izango dira aurtengoak, astegunetan.
Uztailaren 1etik 30era egingo diren Lezoko udalekuetan izena emateko epea astelehenean (hilaren 15ean) zabalduko dela azaldu du Lezoko Udalak. 200 plaza aterako dituzte 3-12 adin tarteko (2012-2021 urteen artean jaiotakoak, biak barne) haurrentzat. Hilaren 26ra arte izango da zabalik izen emate epe hori; aurten, antolaketa kontuengatik, aurreratu egin dute inskripzio epea. Udalekuen barruan bi zerbitzu daude: haurtzaindegia, eta udaleku irekiak.
Uztaileko astegunetan izango dira martxan bi zerbitzuak. Honako xehetasunekin:
- Haurtzaindegia: 08:30etik 09:30era izango da zabalik uztaileko egun horietan. Lanean eri diren gurasoentzako zerbitzua da, eta udalekuak hasi baino ordubete lehenago zabalduko dute. Prezioa: 53 euro haur bakoitzeko, familia ugarien kasuan 40 euro. Zerbitzua abiatzeko gutxienez zortzi haurreko taldea osatu behar da.
- Udaleku irekiak: 09:30etik 13:30era izango dira martxan uztaileko egun horietan. Prezioa: 80 euro haur bakoitzeko, familia ugarien kasuan 60 euro.
Izen ematea eta oharrak
Udalak izena emateko hainbat bide prestatu ditu. Edonola ere, online aukera gomendatu du: Internet bidez plazaren erreserba egiteko, egin klik hemen (hilaren 15ean aktibatuko dute izena emateko aukera). Edonola ere, aurrez aurre apuntatzeko aukera ere badago, Euskara eta Kultura bulegoan, astegunetan 08:30etik 13:30era (hilaren 15etik aurrera). Azken kasu horretan eskuz betetako izen-emate orria nahiz familia ugarien kasuan horren fotokopia entregatu behar dira
200 plaza atera dira. Izen emateak horiek baino gehiago badira, zozketa bidez esleituko dira plazak. Gainera, matrikulazioaren eta horren araberako hobarien gaineko azalpen gehiago nahi dituztenek, kontsulta ditzatela xehetasun horiek udalekuen fitxan.
