"Zaindu gintuztenek, zaintza hobeagoa merezi dute"
Sanmarkosene eta Jesusen Bihotza erresidentzietako langileek arreta desegokia dela salatu dute eta hori erakusten duten adibide argiak eman.
Hamarnaka herritarrek hartu zuten parte atzoko batzarrean. Argazkia: Duintasuna Udalerriko bi adinekoen egoitzetan ematen den artarekin kezkatuta batzarra egin zuten atzo hainbat eragilek. Datorren asterako, oraindik ere zehaztu gabe dauden mobilizazioa eta protestak iragarri dituzte konponbide berehalakoa eskatu eta zaharren egoitzetako erabiltzaileei arreta egoki eta duina egiten zaiela bermatzeko. Duintasunak eman du atzoko batzar irekiaren berri gaur goizean.
Orain Sanmarkosene eta Jesusen Bihotza egoitzetako langileak izan dira egoeraren berri xehe eman dutenak.
Muturreko egoera bizi dutela salatu dute, eta horren berri bizilagunekin partekatu nahi dutela gaineratu. Atzoko batzarraren ostean egindako irakurketarekin bat dator langileena ere, gehiegizko lan kargak eta langile eskasia handia dutela diote, ondorioz, “erabiltzaileei arreta desegokia ematen zaie”. Erabiltzaileek egunero-egunero bizi dutenaren isla diren hainbat adibide jarri dituzte, erresidentzia horien egoera eskasa ageri baino ageriagoan uzten dutenak. Afaltzen dutenetik gosaltzen duten arte 13 eta 15 ordu igaro daitezkeela azaldu dute, “beraz gainerako 9-11 orduetan lau otordu egiten dituzte”. Jaikitzen dituztenetik —07:30-08:00etan izaten da hori— 22:00ak arte, zenbait kasutan, erabiltzaile batzuek gurpildun aulkian eserita pasatzen dituztela ordu horiek guztiak gaineratu dute langileek.
Higienearekin ere gutxienekoak ez omen dira betetzen: “Aldundiak ezarrita dauka erabiltzaile guztiei astean gutxienez bi egunetan dutxatzea, baina langilerik ez dagoenez, gutxieneko horiek ere ez dira betetzen”.
Argi esan dute: “Erabiltzaileei eskaintzen zaien arreta oso urrun dago haiek dituzten beharretatik”.
Garbiketa eta sukaldea ere kaltetuta. Hala daude langileek salatu dutenez, “egun batzuetan janaria kartoizko plateretan eta plastikozko edalontzi eta mahai tresnekin zerbitzatu behar izaten da, garbitzailerik ez dagoelako”. Janariaren kalitatea eta kantitatea ere, ezbaian eta kezka iturri, “sukalde zerbitzuetan kostu txikiko enpresak sartzearen ondorioz janariaren kalitatea eta kantitatea gero eta okerragoa da. Langileok %100 ematen ari gara, baita gehiago ere, eta egoerak hobera egin beharrean, okerrera egiten du egunez egun”.
Langileek, euren aldarrikapenek eta egin duten egoeraren salaketak “bizi kalitatea hobetzeko” balio izatea espero dutela gaineratu dute, “·gure egoitzetako erabiltzaileek merezi dutela uste baitugu”.
Egoeraren ardura ere zehaztu dute langileek, “aldundiak badu egoera guztiaren berri, eta bera da zuzeneko erantzulea”.
