Hibaikako Mutil Gazteek irabazi dute Gipuzkoako Txapelketa
Lan bikaina egin du ontziak liga guztian zehar; kategoria bereko neskak ere bikain ibili dira Gipuzkoako Batel Ligan, atzoko txapelketan baina, ez zuten ginga jartzerik lortu.
Hibaikako Gazte Mailako Mutilak estropada irabazita. Argazkia: Liher Saiz Merezita jaso dute saria Hibaika Arraun Elkarteko Gazte Mailako Mutilek. Asteburu betea izan dute batelek pasatakoa, izan ere, hitzordu bikoitzari aurre egin behar izan diote: Gipuzkoako Batel Ligaren azken jardunaldia jokatu zuten larunbatean San Pedrok antolatuta, eta Gipuzkoako Txapelketa atzo, Pasaiako badiako uretan berriz ere. Gogor aritu dira Hibaikakoak eta fin oro har Gazte Mailako mutil zein nesken ontziek aipamen berezia merezi dute egin duten lan txukunarengatik. Gipuzkoako Ligan buruz buru aritu dira Tolosaldearekin, eta larunbateko jardunaldian, gutxigatik izan bazen ere ez zuten lortu Ligako Bandera etxera ekartzea. Bi eskifaiak, nagusi izan zen Tolosaldea ontzitik bi segundora gelditu ziren sailkapen orokorrean, nahiz eta mutilek estropada irabazi. Neskek bigarren lekua egin zuten larunbateko estropadan. Gipuzkoako Batel Ligaren emaitzak ikusteko, egin klik hemen.
Atzokoa, berriz, egun biribila izan zen Hibaikako Mutil Gazteentzat. Orain arte bezala, lan bikaina, gogotik egin zuten arraun, baita saria jaso ere, Gipuzkoako Txapeldunak izan baitira. Ander Plata, Aitor Legorburu, Anxo Murua, Oier Gallastegi eta Nerea Curto lemazainak osatutako eskifaia izan zen atzoko estropadan onena euren kategorian. Lehia bizia Hibaikakoek Tolosaldeko ontziarekin, baina atzokoan balantza alde jarri zuen Hibaikak eta bandera preziatua etxera ekarri.
Kategoria bereko neskek ere lan ona atzo. Ez zuten lortu txapelketa irabaztea eta hirugarren postuan bukatu zuten Hernani eta Tolosaldearen ondotik. Pena izan zen txapelketan ginga ez jartzea, kategoria bereko mutilek bezalaxe, lan oso txukuna egin dutelako ligan barrena eurak ere. Biak ala biak, oso kontuan hartzeko ontziak, gazte kategoriako bi ontziek liga bigarren postuan bukatuta, Errenteria-Oreretako klubak indar erakustaldia egin duelako.
Gainontzeko kategorietan ere saririk izan da, kontsolazio txandan izan bada ere. Promesa mutiletan, lan bikaina atzoko txapelketan egin zutena euren txanda irabazita, alde handiarekin. Kontsolazio txanda horretan bigarren sailkatu zen Ur Jokori 10 segundo luze atera zizkion Hibaikaren ontziak. Nabarmentzekoa, ontzi horretan bi infantil ari direla. Kategoria bereko neskek ere kopa etxera, mutilek bezala, kontsolazio txandan lehenengo postua eginda atzoko txapelketan. Bigarren sailkatu zen Hernani oso oso gertu izan zuten, baina Hibaikakoak gehiago izan ziren.
Haur Mailan mutilak laugarren sailkatu ziren, eta maila berean, nesketan kontsolazio txandan aritu zen ontzia hirugarren sailkatu ziren. Gipuzkoako Batel Txapelketaren emaitzak ikusteko, egin klik hemen.
Atzoko estropada zuzenean eman zuen Gipuzkoako Arraun Federazioak. Hemen klik eginda ikus daiteke.
Euskadikoari begira
Gipuzkoako Batel Liga eta Txapelketa jokatuta, Euskadiko Batel Txapelketari begira ari da orain Hibaika. Datorren asteburuan jokatuko da Pasaiako Badian hori ere. Hilaren 20an, larunbatean, kanporaketak jokatuko dituzte 16:00etan hasita; eta hilaren 21ean, igandearekin, berriz, finalak.
Gipuzkoako txapelketa bezalaxe, Euskadiko Batel Txapelketa ere zuzenean jarraitzeko aukera izango da. Horretarako klik egin hemen.
