Kirol jarduera berriak probatzeko aukera udal kirol instalazioetan
Denboraldi berriarekin batera, orain arte egin gabeko hainbat jarduera jarriko dituzte martxan, eta horiek ezagutu eta probatzeko aukera izango da.
Ikastaro berrien artean haurdunaldi bitarteko kirol jarduera antolatuko dute. Urrian hasiko den denboraldi berriaren harira Errenteria-Oreretako udal kirol instituzioetan jarduera berriak jarriko dituzte martxan, eta horiek ezagutu eta probatzeko doako erakustaldiak antolatu dituzte hilabete honetan, maiatzean eta ekainean.
Jarduera berriak hiru dira. Haurdunaldi osasuntsua da horietako bat, eta haurdunaldi bitartean egiteko ariketak, uretakoak zein aretoakoak landuko dituzte.
Haurrei begirakoa da martxan jarriko duten bigarren jarduera berria, Motrix. 3-5 urte arteko haurrak, eta 6-8 urte artekoak izango dira hartzaileak eta psikomotrizitatea lantzeko ariketak egingo dituzte tatami baten gainean.
Azkenik korrika egiteko taldea eskainiko dute jarduera berrien artean. Bi maila izango dira inoiz korrika egin ez duten edo oso gutxitan aritu direnei begirakoa bata, oinarrizkoa; eta korrika egiten eta lan aerobikoa egiten ohituta dauden pertsonei begirakoa, bestea. Galtzaraborda inguruan egingo dituzte saioak, kiroldegian hasi eta buka.
Hilabete honetan eta maiatza eta ekainean hilean behin izango da doan jarduera horiek probatzeko aukera. Hilabete honetarako programatutakoak honakoak dira: larunbat honetan Motrix Baby eskainiko dute, 3-5 urte arteko haurrei zuzenduta 10:00etatik 11:00etara eta Motrix Kids 6-8 urte arteko haurrei zuzenduta 11:00etatik 12::00etara.
Hilaren 24an, asteazkenarekin erdi mailako korrika saioa egingo dute 19:30etik 20:30era. Hilaren 26an, berriz, ostiralarekin, haurdunaldi osasuntsua saioa igerilekuan 09:30etik 10:30era.
Erakustaldiak doakoak izango dira abonatuentzat, baina plaza aurrez erreserbatu beharko da Galtzarabordako eta Fanderiako kirol instalazioetako harreretan.
